Palat 256 klur tyngka mang ka sorkar pdeng na ka skhim PRASAD ïa ka Meghalaya

Shillong, Naiwieng, 22: Saw tylli ki projek hapoh ka skhim Pilgrimage Rejuvenation And Spiritual Augmentation Drive (PRASAD) na ka bynta ka jylla Meghalaya ki dei kiba la pyllait ha ka International Tourism Mart kaba 11, kiba kynthup ïa ka jingkyntiew ïa ki jingdon jingem na ka bynta ki nongleit pilkrim sha ka iingmane jong ka Balang Presbyterian ha Nongsawlia, Nartiang Shakti Peeth, ka pung Aitnar bad ka Charantala Kali Temple.
Ïa ka International Tourism Mart kaba 11 la plie ha nongbah Shillong da u Myntri Khynnah jong ka Sorkar Pdeng uba khmih ïa ka tnat Jngohkai Pyrthei u Shripad Yesso Naik ha ka jingïadonlang u Myntri Rangbah u Conrad K Sangma.
Hapoh ka skhim PRASAD ka tnat Jngohkai Pyrthei jong ka Sorkar Pdeng ka la mang 8 tylli ki projek kaba kot T. 256.45 klur na ka bynta ka jingkyntiew ïa ki jaka leit pilkrim ba la ithuh ha ki jylla ka thain Shatei Lammihngi.
Ka Durga Temple ha Nartiang ka dei ka jaka kaba khring bha ïa ki briew kiba leit jngoh ïa ka deiriti ha Jaintia Hills bad kane ka don hajan ka jaka kaba bun bha ki mawbynna.
Ka iingmane jong ka Balang Presbyterian ha Nongsawlia, ka dei kaba la shna ha u snem 1846 da u Thomas Jones, ka long kawei na ki iingmane ba la rim tam ha ka thain Shatei Lammihngi jong ka ri.
Ka pung Aitnar ka dei ka bynta ba kongsan jong ka lehniam Behdienkhlam, ka jinglehniam kaba heh tam jong ki Pnar.
Ka Charantala Temple ha West Garo Hills ka dei ka jaka mane kaba kongsan na ka bynta ki jaitbynriew Hajong bad ki Koch ha ka thain bad kane ka jaka ka khring ruh ïa bun ki briew kiba nabar.
Ka Sorkar India ka la plie ïa ka skhim PRASAD ha u snem 2014-2015 hapoh ka rnat Jngohkai Pyrthei.
Kane ka skhim ka phaikhmat ban kyntiew bad ithuh ïa ki jaka leit pilkrim ha kylleng ka ri ban kyntiew ïa ki kam jngoh kai kiba ïadei bad ka niam. Ka thmu ban pynïasoh ïa ki jaka leit pilkrim ha ka rukom kaba la pynkhreh bha bad kaba lah ban ïaineh kaba don lut ki jingshakri na ka bynta ki nongjngoh kai. Ka jingkiew ki kam jngoh kai ha ka thain ka shong ha ki kam jngoh kai kiba ïadei bad ka jingleit pilkrim.
U Myntri Rangbah jong ka jylla Meghalaya u Conrad K. Sangma ha ka jingïalang plie u la pynpaw ka jingkmen ba ka nongbah Shillong ka ïoh ban pynlong ïa ka International Tourism Mart ha ka sien kaba ar.
U la ong ba ka Sorkar India, hapoh ka jingïalam jong u Myntri Rangbahduh ka ri u Narendra Modi, ka la bteng ban pynthikna ba ka thain Shatei Lammihngi ka kiew ryngkat bad ka ri baroh kawei da kaba plié lut ïa ki lad kiba don ha ki kam bapher bapher ka ban wanrah ïa ka lawei bad ka ïoh ka kot kaba kham bha ïa ka thain.
U la pynpaw ruh ba ka International Tourism Mart ka la long kaba kongsan ban plié ïa ki lad kiba don ha ka thain Shatei Lammihngi kiba ïadei bad ki kam jngohkai, da kaba pyni ïa ka deiriti ba kyrpang jong ka thain, ka pateng, ki dustur tynrai bad ki tiar bad ka long ka jaka pdeng ha kaba kito kiba don bynta ha ki kam jngohkai ki lah ban pynïasoh bad ki nongthied kiba nabar ri bad kumjuh ruh na ka ri.