Pyntreikam ka Sorkar da ka CBHI Scheme ïa ki ASHA; kyntiew ïa ka jingsiew bainong 3 hajar

Shillong, November 22: Ka tnat ka Koit ka Khiah jong ka Sorkar Jylla ka la rai ban pynkiew ïa ka Fixed Incentive jong ki nongtrei ASHA na ka T. 2000 sha ka T. 3000 hapoh ka skhim ba thymmai kaba la tip kum ka Community Based Health Incentive Scheme (CBHIS) na ka bynta ki nongtrei ASHA.
Ïa kane ka rai la shim ha ka jingïalang ba la pynïaid da ka Myntri ka Koit ka Khiah ka Dr. Ampareen Lyngdoh, ryngkat ka jingdonlang jong heh ophisar ka tnat ka Koit ka Khiah ha ka sngi Balang bad ki nongïalam ka Meghalaya ASHA Workers’ Union ha Main Secretariat, Shillong.
Ka Myntri ka Koit ka Khiah ka la pyntip ba ka Sorkar ka la pynlut kumba T. 17 klur ha ka shi snem ban siew ïa ka Fixed incentives kaba T. 2000 shi bnai kum ka Honorarium ba la ai sha ki ASHA nalor ba kaba pynlut sa kumba T. 22 klur 23 na ka NHM kum ka Performance-ased Incentives.
Ka Fixed Incentives na ka bynta ki ASHA la pyntreikam ha u Ïaiong, 2021 namar kumba 70 % ki shnong ha Meghalaya ki dei kiba don ïa ki nongshong shnong kiba duna bad namarkata ban wanrah ïa ka jingïaryngkat ha ka rukom siew ïa ka bainong sha ki ASHA, ka Jylla ka la pyntreikam da ka Fixed Incentices System.
Hapoh kane ka skhim ki Village Health Councils (VHC) ba la khlieh da ki Rangbah Shnong ha ki shnong bapher bapher kin kitkhlieh ban bishar bad ban khein ban diah ïa ka jingtreikam jong ki ASHA ha kaba pyndep ïa ki kam jong ka koit ka khiah.
Ka la pyntip ba u Myntri Rangbah ka Jylla u Conrad K. Sangma u la mynjur ba yn sa siew tam sa T. 1000 bad ban kheiñ lang ïa ka jingsiew kaba T.2 hajar ka Fixed Incentive na ka Sorkar Jylla.
Haoh kane ka skhim ba thymmai, ka jingbishar ïa ka jingsiew bainong ïa ki ASHA, yn pynshong nongrim katkum ka jingtrei jong ki ASHA ryngkat bad ki VHC, ki nongtrei na ki PHC/CHC/Sub-center khnang ban pynjanai ïa ka jingtreikam ha ki shnong ki thaw.
Kine ki kynthup, ban trei shitom ban ïada ïa ka jingim jong ki longkmie bad ki khynnah, ban peit bad ban phah ïa ki NCD Cases, ban pynthikna ba shispah na ka shispah ban pynïoh injek tika ïa ki khunlung ba dang shu kha haduh shi snem bad ban pynthikna shispah na ka shispah ban pyntreikam ïa ka ANC Coverage na ka bynta ki longkmie ba armet bad kiwei kiwei.
La pyntip ruh ba kan sa don ka Committee ban pynbeit ïa kane ka skhim ba thymmai, kata ka Community Based Health Incentive Scheme for ASHA.
Ka Committee kan kynthup ïa kawei ka ASHA kaba mihkhmat na kawei ka district, u nongmihkhmat na ka VHC na kawei ka district, ki ophisar ka NHM, bad ki ophisar ka Sorkar Jylla. Ka Committee kan sa peit ruh ïa ki jingpynsngew ba la buh da ki ASHA ha ka jingïalang kaba la long mynta ka sngi.
U Principal Secretary jong ka tnat ka Koit ka Khiah u Sampath Kumar u la ïaiban ba ka Jylla ka ladep shimkhia ïa ka jingpynsngew jong ki ASHA. U la ong ba ka Jylla ka la trei khlem shongthait ban sngap ïa ki jingeh ba la ïakynduh da ki nongtrei ka koit ka khiah. Ka Jylla ka la buh eh hakhmat ïa ki ASHA ban siew ïa ka bainong bad ban kiar katba lah ban pynslem ïa ka jingsiew bainong.
Shuh shuh u la ong ka thong ka long ba ym dei ban klet ban ïada ïa ki jingim.
U la pyntip, khnang ban pynthikna ba ki ASHA kim ym khia palat ka kam, ka tnat ka Koit ka Khiah dang shen ka la pynmih ïa ka ‘Executive Order” kaba batai shaphang ka kamram jong ki Medical Officer, Mid Level Health Care Provider bad ki ANM ha manla ki jaka ba don ki shlem ai jingmut na ka bynta ban leit jngoh khah khah ïa ki shnong bad ban pynjan ïa ka jingshakri sha ki paidbah.