Shillong, Naiwieng 22: U State President ka NPP Meghalaya Unit, Bah Prestone Tynsong ha ka sngi Balang u la pyntip ba ka state election committee jong ka party ka la dep ban phah ïa ka kyrteng ki kyrtong MP na Shillong bad Tura sha u National President ka party ban ai ka jingmynjur.
Haba kren bad ki lad pathai khubor, u Bah Prestone u la ïathuh ruh ba la kumno kumno mynta ka taiew, tang shu ïoh ïa ka jingmynjur na u National President kin sa pynbna paidbah noh ïa ki kyrteng.
U Bah Prestone u la ïathuh ruh ba ki don ym duna ïa ka 5 bad 6 ngut ki kyrtong kiba pan tiket na kawei kawei ka constituency ha kane ka elekshon MP mynta ka kynti.
Halor ka jingkylli ïa ka daw ba ka sorkar MDA kam pynieng da u kyrtong monlang kumba leh ha ki por ba la dep, na ka liang u Bah Prestone ba dei ruh u Symbud Myntri Rangbah ka Jylla u la ong ba katei kadei namar ba kam don satia ka jingïapynbeit bad kino kino ki party ba don lang ha ka kynhun synrop Meghalaya Democratic Alliance.
