Shillong, Kyllalyngkot 25: Ka jingïakhun hapdeng ka Nongrim Hills SC pyrshah ïa ka Mylliem SC hynne ka sngi ha ka lympung 1st DIVISION Football League 2023-24 ba la pynïaid da ka Shillong Sports Association ha madan phutbol SSA Ground, ka la jam sha kaba kut ha kaba ka Nongrim Hills SC ka la khur ïa ka jingjop da 4-1 kol.
Haba phai sha ka jingïalehkai, ka Nongrim Hills SC ka la ïoh ban tehlakam kham bun shah ïa ka bol hynrei ka la shimpor tad ynda la jam sha ka 32 minit ba u Glenny Lyngrah un thep ïa ka kol kaba nyngkong shuwa ba un pynbud ïa ka kol kaba ar ha ka 45 minit.
Haba jam sha ka kylla kaba ar, ka Mylliem SC ka la pyrshang katlah katïai ban pynphai bad ha ka 82 minit ka la ïoh ban pynjan ïalade ban ïakhaid lyngba ka kol u Janhameshwa Marngar ha ka 82 minit.
Hadien ba shah pynphai, ka Nongrim Hills SC ka la sdang ban pynkhlaiñ shuh shuh ïa ka rukom lehkai bad ha ka 90 minit u Supong Lemba Khongwir u la ïoh ban thep ïa ka kol kaba lai shuwa ba u Justerwell Tham un pynthikna namjop da kaba thep ïa ka kol kaba khadduh ha ka 90+2 minit.
