Shillong, Kyllalyngkot 25: Ki ar tylli ki jingïakhun jong ka lympung Shillong Cricket League 2nd Division ba la long hynne ka sngi ha madan Urkaliar ki la jam sha kaba kut ha kaba ka kynhun Sportive Juniors ryngkat bad ka New warriors ki la khur jingjop.
Ka jingïakhun kaba nyngkong ka la long hapdeng ka Sportive Juniors pyrshah ïa ka Golflinks CC, ïa ka toss la jop da ka Sportive Juniors bad ka la jied ban tied nyngkong bad tied pyndep ïa ka 20 over ban kynjoh sha ka 187 ron, shah pynhap 6 wicket.
U Bapan Dutta u la tyngshaiñ bha ha ka tied da kaba khyrwit haduh 63 ron na ki 48 bol, bad na ka liang jong u Digbijoy Roy u la lah ban tied 57 ron naki 26 bol. Haba phai pat sha ki rangkawangbol ka liang pyrshah, u Ankit Ojha u la kawang 4 over, shah tied 46 ron bad khur 2 wicket.
Haba pyrshang ban beh ïa katei ka thong, ki rangtied ka Golflinks CC ki la shah pynkut noh tang 115 shuwa ban hap baroh 10 wicket ha ka 13.5 over. Napdeng ki rangtied kiba la lehkai bha ki long u Ankit singh rathor (27 ron naki 19 bol) bad u Rahul singh (22 ron naki 19 bol) hynrei kam shym la biang ïa ka kynhun ban khur ïa ka namjop.
Ka Sportive Juniors ka la khur ïa ka namjop da 72 ron, bad na ki rangkawangbol ba seisoh ki long u Rahul Juri u la kawang 3 over, shah tied 28 ron bad khur 2 wicket, katba u Kishan das u la khur haduh 4 wicket, shah tied tang 21 ron na ki 4 over bad khur syndon ïa ka nam Player off the match.
Ka jingïakhun kaba ar, ka New warriors ka la khur ïam ka namjop hadien ba ka la pynliem ïa ka Inningstar CC da 3 wicket.
Ka jingïakhun ka la sdang ha kaba ka Inningstar ka la ïoh ban tied nyngkong hadien ba jop ïa ka toss, bad na ka liang kane ka kynhun ka la buh thong 122 ron shuwa ban hap baroh 10 ngut na ki 16.5 over. U Lukhu k Anal u la tied 45 ron naki 30 bol, katba u Vijay rai u la tied 20 ron na ki 10 bol. Napdeng ki rangkawangbol ka liang pyrshah, u Bikram Pradhan u la kawang 4 over, shah tied 15 ron bad khur 3 wicket, katba na ka liang jong u Pankaj Chanda u la kawang 4 over, shah tied 23 ron bad pynhap 2 wicket.
Ka New warriors ka la pyndep kynjoh sha ka thong tang hapoh ka 13 over, da kaba tied 123 ron hap 7 ngut ban jop da 3 wicket. U Anupam Paul u la tied 26 ron naki 22 bol, katba u Prasanjit Chanda u la tied 20 ron naki 14 bol, bad ïa ka nam Player off the match la khur da u Bikram Pradhan u ba la khur 3 wicket na ka kynhun New warriors .
