Dang tang 2 snem duna, 7 tylli ki takma khur ka samla Airikmenlang Shabong na ka Arm Wrestling

Shillong, Kyllalyngkot 25 : Wat hapdeng ka jingïaid lynti kaba dang ar snem duna, hynrei i la lah pat ban khur haduh hynñiew tylli ki takma na ka jingïakop ïakhun kti lane ka arm wrestling ha ki rynsan ïakop ïakhun kti shabar ka Jylla bad shabar ri India ruh kumjuh.
Ka samla Airikmenlang Shabong ba 22 snem ka rta ba shong ba sah ha Laimer Upper Shillong bad ka shnong trai kadei na Madanbitaw Wahlang kaba don ha ka thaiñ Nongspung East Khasi Hills District, kadei ka samla kaba la ïoh ban khur ïa kitei ki takma.
Ka samla Airikmenlang Shabong haba ïakren bad u Mawphor ha ka jaka kilan met kaba don ha Rynjah, ka la ïathuh ba ka la sdang ban ïalehkai ïakhun kti ha u snem 2022. Ka la ïathuh ba nyngkong ka ju ïalehkai boxing, hynrei kat kaba ka ïashim bynta ha ki jingïalehkai ka ju mad beit ka nam rem.
Dei hadien ba ka la ïohi na ki paralok kiba la buh status ba ka don ka jingïakop ïakhun kti, kumta ka la leit ban pyrshang noh da kane ka jait jingïalehkai da kaba pynleit jingmut bad kilan met bha ïalade. Ka la leit ban ïa aireng ha ka jingïalehkai ha kaba la jop naduh kaba sdang haduh ka ka phainal.
Dei hangne ha ka samla Airikmenlang Shabong ka la sngewthuh ba ka don ïa ka sap ïalehkai ïakhun kti ba U Blei U la ai kyrpang ha i bad ka la sdang ban ïai trei shitom ha kaba ka la ïoh ruh ban leit ïakhun shabar ka Jylla, shabar ri lyngba ka Meghalaya Armwrestling Association ha kaba ka la ïoh ban khur ïa bun tylli ki takma.
Ka samla Airikmenlang Shabong ka dang pule ïa ka BA 1st year ha St Anthony’s College. Ka la ïathuh ba hapdeng ka jingïaid lynti jong ka ha ka kam ïalehkai bad ka jingpule ka don ka por ba ïatyngkhuh.
Ha ka por ba thoh eksam ïa ka klas 12 nga la hap ban pep hynrei ki nonghikai ki la ai mynsiem bad ki la pynbeit bad ailad ïanga ban thoh eksam ha kawei pat ka sngi. Nga ai khublei ïa ki nonghikai kiba la kyrshan lem ïanga,” ong ka samla Airikmenlang.
Na ka liang ka samla Airikmenlang Shabong ka la kyntu ïa kiwei pat ki para samla ba kin trei shitom la ki don ha kano kano ka sap ïalehkai khnang ban lait na ki jingmlien ba sniew khamtam na u drug, uba la jyllei bha ha kine ki sngi ba mynta.
Ka samla Airikmenlang Shabong ka la ïoh ruh ban leit ïashim bynta ha ka 5th Meghalaya Games 2024 kaba dang shu kut shen ha Tura kum ka referee jong ka jingïakop ïakhun kti. Ka la ainguh eh nyngkong ïa u Blei Uba la btin lynti ïa ka ha kane ka kam ïalehkai, ïa ki kmie ki kpa, coach bad ki paralok kiba ju don syndah bad ka ha ki jingïalehkai bapher bapher.
Ka samla Airikmenlang Shabong kadei ka khun ba nyngkong napdeng saw ngut jong ka Kong Serita Shabong bad u Bah Elisius Rani. Ka la ïoh ban khur ïa 3 tylli ki takma rnong na ka International bad 4 tylli na ka National, 2 tylli ki takma rupa bad 2 tylli ki takma rnong.