Shillong, Risaw 26: U bah Rayonald Kharkamni, Secretary ka Meghalaya Cricket Association, u la shah thung kum u Convener na ka bynta ka North East Zone ha ka lympung Senior Women T20 Inter Zonal BCCI Tournament 2026-27, ka ban long ha Assam.
Ka North East zone ka kynthup ïa ka Arunachal Pradesh, Manipur, Meghalaya, Mizoram, Nagaland bad ka Sikkim. Ka jingthung ïa u ka long kum ka jingithuh ïa ka jingshimkhia jong ka MCA na ka bynta ban kyntiew ïa ka jingïalehkai kriket.
Katkum kane, u bah Rayonald Kharkamni ula khot ïa ka jingïalang na ka bynta ka taïew ba nyngkong jong u bnai Naiwieng ha Guwahati ban jied ïa ka kynhun ka ban mihkhmat ïa ka thaiñ shatei lammihngi. U Mamon Majumdar, u dkhot jong ka IPL Governing Council un ïadon lang ruh ha kane ka jingjied ïa ki nongïalehkai jong ka zonal team.
La buh ruh ka jingkyrpad ïa baroh 6 tylli ki jylla ba kin ai jingmut ïa ki kyrteng jong ki nongjied jong ki hapoh ka 30 tarik u Risaw khnang ban ïoh rung ha ka zonal selection committee. Ka komiti kan jied ïa ka kynhun kaba don 15 ngut ki dkhot.
U nongpynïaid jong ka zonal un jied ruh ïa ki support staff – coach, assistant coach, physio, trainer, performance analyst, masseuse bad manager jong ka kynhun.
