TSA: Mad jingjop ka Niriang SC haka First Division, ka Lumphyrnai Sohphoh haka Super Division

By Mawphor Editor On Oct 27, 2026

Jowai, Risaw 26: Ka lympung ïalehkai phutbol ‘Hajan Shylla Memorial Football League 2026’ jong ka kyrdan ‘1st Division’ bad ka kyrdan ‘Super Division’ kaba la tip kum ka ‘Kesilroy Memorial Football League 2026’ kaba la long mynta ka sngi 26 tarik u Risaw 2026, bala pynïaid daka Thadlaskieñ Sport Association (TSA) ha madan Wahiajer Multi Sports Complex Stadium.
Haba phai sha ka jingïakhun ba nyngkong jong ka ‘1st Division’ ka kynhun ïalehkai jong ka Niriang SC kala jop da 4-2 kol ïaka Dongmihsngi SC, ïa ki kol naka Niriang SC la thep da u Banshan Mukhim haka minit ba 9 & 37, u Iohibiang Siangshai haka minit ba 14 bad u Da o Muruh haka minit ba 47. Ïaka kol naka Dongmihsngi SC la thep da u Samuel Siangshai haka minit ba 23 & 32.
Katba haka jingïakhun ba ar jong ka (Super Division) ka Lumphyrnai Sohphoh kala jop da 9-1 kol ïaka Krem Kum Nongkhroh, ïa ki kol naka Lumphyrnai Sohphoh la thep da u Pynbiang Suting haka minit ba 11 (Penalty) & 33, u Decidious pyrtuh haka minit ba 25, 33, u Snowell Kharsati haka minit ba 44, u Habandajop Khriam haka minit ba 49, u Sanowel Suting haka minit ba 64, 90 bad u Walson Suting haka minit ba 84. Ïa ka shikol naka Krem Kum Nongkhroh la thep da u Alemon Nongspung haka minit ba 82.
La pyntip ka jingïakhun lashai ka sngi haka 27.10.2026 haka kyrdab ‘1st Division’ kan long hapdeng ka Lumsharatoh pyrshah ïaka Namdong SC haka por 11 baje mynstep. Katba haka kyrdan ‘Super Division’ haka por 2 baje shiteng nohphai sngi ka Ummulong SC pyrshah ïaka Ialong SC.

Prev Post

Rah nam lahduh ka ka RCLPS Mawlat, RCLPS Dienglieng bad Holy Cross Mawkynrew ha ka march-past Shillong, Risaw 24: Ka RCLPS Mawlat, RCLPS Dienglieng bad ka Holy Cross Secondary School, Mawkynrew, ki la ïohrah ïa ka nam lahduh ha ka jingïaid march-past ha la ki jong ki kyrdan, ha ka lympung ïalehkai hapdeng ki skul ba la pynlong da ka Holy Cross Secondary School, Mawkynrew. Haduh 30 tylli ki skul na ka dong ka thaiñ ki la wan ban ïashim bynta ha kane ka lympung, kaba la pynlong ha madan phutbol jong ka skul naduh ka 22 haduh ka 23 tarik Risaw. Ki khynnah kiba ïashim bynta ki kynthup naduh ka kyrdan Lower Primary, Upper Primary haduh Secondary. Ha ka jingïaid march-past, ka RCLPS Mawlat ka la rah ïa ka nam lahduh ha ka liang ki shynrang bad kynthei jong ka kyrdan Lower Primary. Nangta ka RCLPS Dienglieng ka la khur ïa kajuh ka nam ha baroh ar liang jong ka kyrdan Upper Primary, katba ka Holy Cross Secondary School, Mawkynrew, ka la jop ha ka liang ki shynrang bad kynthei jong ka kyrdan Secondary. Ka prokram plie ka la kynthup ïa ka jingïaid march-past jong ki skul, ka jingpynmeh ïa ka sharak Olympic bad ka jingshim smai ba la ïalam da u kapten ïalehkai. Katkum ka prokram, la buh ïa u Bah Rapsang, Deputy Director ka Nehru Yuva Kendra Sangathan hapoh ka Tnad ki Kam Samla bad Ïalehkai jong ka Sorkar India, kum u kongsan, katba u Bah Jherden Lyngdoh na ka 2 NCC u la don bynta ha ka prokram pynmeh ïa ka sharak Olympic. La kynthup ruh ïa ka jingkren pdiang burom na u Phadar Anupam, ka jingkren jong u kongsan, ka jingpynkup burom, ka jingsam tiar sha ki khynnah bad ka jingpynbna plie ïa ka lympung. Ki khynnah ka St. Paul School, Jatah Lakadong, ki la pyni ruh ïa ka drill. Ha ka jingïamareh 200 mitar jong ki shynrang, u Holestar Nongrum u la wan ba nyngkong, bud sa u Libony Nongrum ha ka kyrdan ba ar bad u Blessing Nongrum ha ka kyrdan ba lai. Ha ka liang ki kynthei, ka Inarity Nongrum ka la wan ba nyngkong, ka Mintainda Bina na ka Holy Cross Secondary School ka la wan ba ar, katba ka Ritngenlang Mynsong na ka St. Paul, Jatah, ka la wan ba lai. Ka Holy Cross ka la rah ruh ïa ka nam lahduh ha ka jingïamareh relay jong ki shynrang bad kynthei, katba ka St. Paul ka la wan ba ar ha baroh ar tylli ki jingïakop. Ha ka jingïakop high jump jong ka kyrdan Secondary, ka Holy Cross ka la khur lut ïa ki kyrdan ba nyngkong, ba ar bad ba lai ha ka liang ki shynrang bad kynthei. Ha ka long jump jong ki kynthei pat, ka St. Paul Secondary School, Jatah, ka la khur lut ïa ki lai kyrdan. Nalor ki jingïamareh bad ki jingïakop kynthih, la pynrung ruh ïa ka jingïalehkai kho-kho bad mawpoin, kaba la ai lad ïa ki khynnah ban pyni ïa la ki sap bad ka jingïatreilang. La pynkut ïa ka lympung da ka jingsam khusnam sha ki nongjop, ha kaba u MLA ka Mawkynrew, u Bah Banteidor Lyngdoh, u la long u kongsan. Haba ai jingkren, u la ïaroh ïa ki sap bad ka jingtbit jong ki khynnah, bad kyntu ïa ki ban ïai kilanmet bad trei shitom khnang ban kiew sha ki kyrdan jingïakop kiba kham shajrong.

Next Post

BCCI women’s inter-zonal: Shah jied u Rayonald Kharkamni kum u Convener ka NE Zone

Leave A Reply