Rah nam lahduh ka ka RCLPS Mawlat, RCLPS Dienglieng bad Holy Cross Mawkynrew ha ka march-past Shillong, Risaw 24: Ka RCLPS Mawlat, RCLPS Dienglieng bad ka Holy Cross Secondary School, Mawkynrew, ki la ïohrah ïa ka nam lahduh ha ka jingïaid march-past ha la ki jong ki kyrdan, ha ka lympung ïalehkai hapdeng ki skul ba la pynlong da ka Holy Cross Secondary School, Mawkynrew. Haduh 30 tylli ki skul na ka dong ka thaiñ ki la wan ban ïashim bynta ha kane ka lympung, kaba la pynlong ha madan phutbol jong ka skul naduh ka 22 haduh ka 23 tarik Risaw. Ki khynnah kiba ïashim bynta ki kynthup naduh ka kyrdan Lower Primary, Upper Primary haduh Secondary. Ha ka jingïaid march-past, ka RCLPS Mawlat ka la rah ïa ka nam lahduh ha ka liang ki shynrang bad kynthei jong ka kyrdan Lower Primary. Nangta ka RCLPS Dienglieng ka la khur ïa kajuh ka nam ha baroh ar liang jong ka kyrdan Upper Primary, katba ka Holy Cross Secondary School, Mawkynrew, ka la jop ha ka liang ki shynrang bad kynthei jong ka kyrdan Secondary. Ka prokram plie ka la kynthup ïa ka jingïaid march-past jong ki skul, ka jingpynmeh ïa ka sharak Olympic bad ka jingshim smai ba la ïalam da u kapten ïalehkai. Katkum ka prokram, la buh ïa u Bah Rapsang, Deputy Director ka Nehru Yuva Kendra Sangathan hapoh ka Tnad ki Kam Samla bad Ïalehkai jong ka Sorkar India, kum u kongsan, katba u Bah Jherden Lyngdoh na ka 2 NCC u la don bynta ha ka prokram pynmeh ïa ka sharak Olympic. La kynthup ruh ïa ka jingkren pdiang burom na u Phadar Anupam, ka jingkren jong u kongsan, ka jingpynkup burom, ka jingsam tiar sha ki khynnah bad ka jingpynbna plie ïa ka lympung. Ki khynnah ka St. Paul School, Jatah Lakadong, ki la pyni ruh ïa ka drill. Ha ka jingïamareh 200 mitar jong ki shynrang, u Holestar Nongrum u la wan ba nyngkong, bud sa u Libony Nongrum ha ka kyrdan ba ar bad u Blessing Nongrum ha ka kyrdan ba lai. Ha ka liang ki kynthei, ka Inarity Nongrum ka la wan ba nyngkong, ka Mintainda Bina na ka Holy Cross Secondary School ka la wan ba ar, katba ka Ritngenlang Mynsong na ka St. Paul, Jatah, ka la wan ba lai. Ka Holy Cross ka la rah ruh ïa ka nam lahduh ha ka jingïamareh relay jong ki shynrang bad kynthei, katba ka St. Paul ka la wan ba ar ha baroh ar tylli ki jingïakop. Ha ka jingïakop high jump jong ka kyrdan Secondary, ka Holy Cross ka la khur lut ïa ki kyrdan ba nyngkong, ba ar bad ba lai ha ka liang ki shynrang bad kynthei. Ha ka long jump jong ki kynthei pat, ka St. Paul Secondary School, Jatah, ka la khur lut ïa ki lai kyrdan. Nalor ki jingïamareh bad ki jingïakop kynthih, la pynrung ruh ïa ka jingïalehkai kho-kho bad mawpoin, kaba la ai lad ïa ki khynnah ban pyni ïa la ki sap bad ka jingïatreilang. La pynkut ïa ka lympung da ka jingsam khusnam sha ki nongjop, ha kaba u MLA ka Mawkynrew, u Bah Banteidor Lyngdoh, u la long u kongsan. Haba ai jingkren, u la ïaroh ïa ki sap bad ka jingtbit jong ki khynnah, bad kyntu ïa ki ban ïai kilanmet bad trei shitom khnang ban kiew sha ki kyrdan jingïakop kiba kham shajrong.