Shillong, Naitung 23: Ka rynsan ka la long kaba la pynkhreh ban ïoh ban sakhi noh pat ïa kawei na ki lympung ïalehkai phutbol bna nam ka jylla, ka Shillong Premier League 2026, ïa kaba la buh ban sdang noh ïa ka naduh kane ka sngi Saitjaiñ jong ka taiew, ha kaba ka jingïalehkai sdang kan long hapdeng ka klob kaba bat ïa ka burom lahduh ha ka samoi ba la dep ka Langsning Football Club pyrshah ïa ka Sawmer SC, kaban sdang ha ka por 4:45 nohphai sngi.
Kumba ka long ïa mynta, ki prokram ïalehkai kane ka lympung ka dang long shwa tang naka bynta ki hynniew tylli ki jingïakhun bad kiba sah pat, ka Shillong Sports Association kan sa pynllait pat ha ki sngi ban sa wan, kaba jia long da kaba pynshong nongrim ïa ka jingïashim bynta ki lai tylli ki klob ka nongbah ha ka lympung ba la rim tam ha ka dewbah Asia ka Durand Cup.
Wat ha shwa ba kane ka lympung kan khreh ba kan sdang noh, hynrei sharum shaneng lada ïaid da ïeng, ka jingïakren u paidbah uba bun balang ka long ïa ka kynhun ïalehkai ka Nongkseh SSCC, kaba ha kane ka kynti kaba mynta, kan sdang ba kan ïakhun pat sa ha kane kawei pat ka kyrdan ïalehkai hadien ba ka la lah ba kan rah ïa ka nam lahduh jong ka First Division, ha kaba ka jingrah ïa ka nam lahduh ka wan syndon da ka nam jop kaba long 9 sien lynter.
Hadien kane, ka Nongkseh ka la ïai bteng ba kan ïalehkai bha tad haduh ba kan da lah ba kan rah wat ïa ka nam lahduh ka SSA Champions Cup da kaba pynliem ïa ka Shillong Lajong FC, hadien kane ka la bteng ban nang jam shuh shuh shakhmat tad haduh ba kan da wanphai kum ka lahduh na ka lympung ïalehkai jong ka Sikkim Gold Cup bad nangta ka la rah pat ïa ka nam lahduh jong ka lympung 5th Meghalaya State League jong ka MFA.
Kaba pynkmen ïa ka Nongkseh ka long ba ha shi lynter ka lynti ïaid ka jong ka ban rah ïa kitei ki nam lahduh baroh ka wan hadien ba kam shim la shah rem wat tang kawei ruh ka jingïakhun, bad dei halor kane ka nongrim ba wat mynta ruh, baroh baroh hi ki ñiew bad shim ba ka Nongkseh SSCC ka lah ba kan rah wta ïa ka nam lahduh jong ka SPL mynta ka snem.
Haba phai sha ka kynhun ïalehkai ka Langsning FC kaba bat mynta ïa ka nam kum ka lahduh ka SPL ha ka samoi kaba la dep, ka jinglah ka jong ka ban rah ïa kane ka nam lahduh ka dei tad haba la ïakhun ïa ka kylla kaba san (Round-5), hadien kane ka la bteng ba kan ïakhun biang pat sa haka lympung jong ka MSL, ha kaba na kaba sdang ka la lah ban jam shakhmat da kaba suk bad dei tad haduh ba ka la ïakhun ïa ka semifinal, kaba hangne ka la hap ba kan ïakhun pyrshah ïa ka Shillong Lajong, kaba hangne, ka kynhun ka la lah ba kan ïakhun tyngeh shaduh ka tie breaker, bad ban jop ïa ka jingïakhun ban jam sha ka phainal, hynrei ban shah liem noh da 2-1 hakhmat ka Nongkseh SSCC.
Haba kyrtiang dien biang sha ka samoi ïalehkai ba la dep shipor na ka liang ka Lajong kaba la rah san sien ïa ka nam lahduh ryngkat bad ka Mawlai SC kaba la rah ar sien ïa ka nam lahduh ki la don lem ha ka thong ban rah ïa ka khusnam, hynrei tden ki la sahkut sah hajuh hadien ka jingbym shim la lah ban jop pat ïa ki jingïakhun kiba dang sah, kaba hangne ka jingkhang ka plie lad hi war ïa ka kynhun ïalehkai ka Langsning FC ban rah ïa ka nam lahduh.
Katba na ka liang ka kynhun ïalehkai ka Rangdajied United FC, kaba la rah teng ïa ka nam lahduh ha ka snem 2013 bad ban wan ba-ar kumba hynniew sien, ka la lah ba kan buh jaka lem sha ka lympung ïakhun jong ka Super Cup, pynban haba la dei ban ïakhun pat ha ka MSL, kum ka kynhun ka la hiar bha ka rukom ïalehkai ka jong ka, kaba wat la katta yn nym pat lah ban khieñ duh ïa ki namar kum ka kynhun ka don ha ka ïa shi kynhun ki khynnah ïalehkai kiba la sdang ban san bad ban kiew ka jingim ïalehkai ka jong ki.
Katba kawei pat ka kynhun kaban don lang ha kane ka samoi ïalehkai ka dei ka MLP FT, kaba watla ka long kaba jar jar, hynrei ka jinglah ka jong ka ban wan ba-ar ha ka First Division u snem ba la dep, kan long ka kabu ksiar ïa ka ba kan khreh ban paw ha kane ka samoi ïalehkai ba mynta ka SPL, bad kan jin da la lah ban nang pynrung shuh shuh sa kumba kato katne ki rang ïalehkai ba thymmai, lehse ka lah wat ba kan pynurlong ïa ka jingthmu ka jong ka ban ïaknieh ban rah ïa ka nam kum ka lahduh.
Katba sa kiwei pat ki saw tylli ki klob ban ïakhun ha kane ka lympung ka SPL ki kynthup ïa ka Sawmer, Nangkiew Irat, Laitkor bad Mylliem, kaba ha ka samoi ïalehkai kaba la dep, shipor ka kynhun ïalehkai ka Nangkiew ka paw kumba ka la don ha ka thong ban rah ïa ka nam lahduh, hynrei ha kaba kut, ka la hap ba kan hun noh ban bat ïa ka kyrdan kaba saw, hynrei mynta ka samoi kum ka kynhun ka la nang pynkhlaiñ ïa la ka jong ka kynhun kumba la paw ha ka inter club transfer of player ka SSA.
Katba ka kynhun ïalehkai ka Mylliem, ka don ïa ka jingkyrmen ba kan lah ban nang kham kyntiew ïa ka sur ïalehkai ba bha ka jong ka hadien ba kan lah ban bat ïa ka kyrdan kaba phra ha ka samoi ïakhun kaba la dep, katba ka Sawmer SC bad ka Laitkor SC, ki long ki kynhun kiba yn nym lah ban khein sting ïa ki, kiba don ki khep kiba ju lah ban pynkylla pongpet ïa ka resol, ïa kaba ki lah ruh ban leh biang kumne ha kane ka samoi ba mynta.
Kumta haba kane ka lympung ïalehkai ka long beit tang ha ka dur ban ïakhun beit shi lynti ne single leg, da kumta man la ki jingïakhun ïa ki kynhun ka long beit kum ka phainal, kaba hangne man la ki rang ba ïalehkai kin hap ban trei shitom, pynleit jingmut bad ai shisha ka buit ka bor ïalehkai ka jong ki bad ba doinkam ban ïai bteng haduh kaba kut.
Hynrei ka samoi ïalehkai mynta hi ka snem ka long ba jan man la ki kynhun, ki la kham ïaleh katba lah ban nang pynkhlain ïa la ki jong ki jong ki kynhun, namar ka thong kaba shah eh hakhmat jong ki ka long ban ïoh ban phong ïa ka pansngiat ka nam lahduh jong kane ka samoi ïalehkai SPL 2026.
