Hakhmat palat 20 hajar ngut u paidbah ai nam u Dy.CM ïa ka jinglong kawei ka Sorkar MDA ba kiew ka roi ka par

Shillong, Naitung 22 : U Symbud Myntri Rangbah u Ma Sniawbhalang Dhar ha ka miet sngi Ba-ar ula ong ba ka jingskhem bad jinglong kawei jong ka Sorkar Meghalaya Democratic Alliance (MDA) ba ïalam ka National People’s Party (NPP) bad ka jingpynleit jingmut ha ka synshar khadar ha ka jaka ka ïaknieh bor, ka la pynlong ïa ka Meghalaya ban kynjoh ïa ka roi ka par kaba bun shah ha kine ki phra snem ba la leit noh. ïa kane u la pynpaw hakhmat palat 20 hajar ngut ki paidbah kiba la poi sha kane ka jingïalang ban sakhi bad sngap ïa kaei kaba ki Nongïalam bad u kyrtong ka NPP ki don ban pynshai sha ki paidbah.
Haba kren ha ka rynsan ïalap elekshon ha Ummulong Madan Khawang ban pan jingkyrshan ïa u kyrtong ka NPP ban ïakhun ïa ka elekshon shiteng samoi ka Shillong Lok Sabha u Dr DRL Nonglait, u Ma Sniawbha ula ong ba ka Sorkar ba ïalam ka NPP ka la lah ban ai ïa ka jingshakri namar ki 32-33 ngut ki MLA jong ka, ki la ïatreilang khlem ka jingïaknieh long nongïalam.
“La palat phra snem mynta ngi la synshar ïa ka Jylla. Watla ngi don 32-33 ngut ki MLA, ngim ju ïashrut bad don ka jingïapher jingmut hapdeng jong ngi. Ngim don por ban ïaknieh bor ne ïaknieh shuki ne ïa pynkhyllem Nongïalam kumba long kiwei ki Party namar ngi bunkam ban trei na ka bynta u paidbah” ong u Ma Sniawbha.
Ula ïanujor bad ki Sorkar kiba la leit noh haba ong ba ki Myntri Rangbah ki kylla man ka 7 lane 8 bnai. “Na kata ka daw ngi don ïa ka jingïatylli bad ka jingïadei kaba ïajan bad dei na kata ka daw ngi la lah ban ïalam ïa ka Jylla sha kawei pat ka kyrdan kaba wat ki Myntri ka Sorkar Pdeng ruh ki ju pynpaw bad ai ka jingïaroh ba ka dei ka jingjylla kaba kiew sted tam. Ngi dei ruhka sorkar kaba buh hakhmat eh ia u paidbah bad ïa ka bor ne shuki shadien” ula bynrap.
U Ma Sniawbha ula pynksan ïa ka Sorkar pyrshah ïa ki jingkynthoh halor ka jingshim ram, da kaba ong baroh ki ram ki dei kiba la shim hapoh u pud bala buh da ka Finance Ministry bad kaba ïaid kat kum ki kyndon ba la buh daka sorkar pdeng bad na ki ram ba la shim kaba bun ka ram yn siew da ka sorkar pdeng tang khyndiat eh da ka sorkar jylla.
“Ha u 2018, ka mang tyngka ka Jylla ka long 9000 klur tyngka. Mynta kala kot ia ka 30,000 klur tyngka. Ka daw ka long ba ngi don ïa ki nongïalam kiba trei shitom” ula ong.Ula kdew ïa ka jingpynshai ba dang shen jong ka Myntri Pla Tyngka ka Ri ba ka ram jong ka Meghalaya ka long hapoh u pud ba la buh bad pynpaw ba bun ki ram ba la pynbna da u Myntri Rangbah ki dei ki ban siew pat da ka Sorkar India.
“Kam mut satia ba tang namar ba phi don ha ka bor phi lah ban leh kat kaba mon. Kano kano kaba ngi leh ki dei kiba hap ïaid kat kum ki kyndon aiñ bad ki jingteh kyndon” ula ong.
U Ma Sniawbha ula ïathuh ïa ka jingpynlut haduh 10,000 klur tyngka ha ki surok-4,600 klur tyngka ban pynbha ïa ka surok ba 3,400 Km bad 5000 klur tyngka na ka bynta ban shna ïa ki surok thymmai ba 600 km.
Ula ïathuh ruh ba u Myntri ka Sorkar Pdeng u Nitin Gadkari ula kular ban ai biang ïa ka song pisa sa 39,000 klur tyngka ïa ka Meghalaya bad u Myntri Rangbah Duh ka Ri un sa buh ïa u maw nongrim shen jong ki project ba 21,000 klur, ka surok Four Lane ba 166 Km na Umroi sha Ratacherra.
U DyCM ula ther ruh ïa ki seng sain pyrthei kiba don ha ka liang pyrshah kiba ïai kynnoh bamsap khlem da lah pat ban ai ïa ki sakhi-sabut ne jingpynshisha.
“Nga sngew synei ïa kiwei ki seng saiñ pyrthei kiba lapmiet ban pyrta ‘bamsap’ ‘bamsap’ man ka sngi. Lada phi sngew kumta, ai ïa ki sakhi sabut. Hynrei ki briew ba lui lui ki la shah ïalam bakla da kum kine ki jingkynnoh ba khlem nongrim” ula ong.
Ula pynkut da kaba kyntu ïa ki nongthep vote ban kyrshan ïa u Dr Nonglait ha kane ka elekshon shiteng samoi ban wan ka Shillong Lok Sabha Parliamentary Constituency.