Shillong, Naitung 23: Ka Madan SCC ka la ïoh ba kan sdang ïa ka jingïakhun jong ka ha ka lympung Second Division Football League 2026 jong ka Shillong Sports Association (SSA) da kaba jop 3-0 pyrshah ïa ka Nongrah hynne ka sngi Palei ha SSA Stadium.
Shuwa ban sdang ïa ka jingïalehkai la pynlong ïa ka jingsngapjar kaba shi minit na ka bynta ka jingkhlad noh u Winifred Majaw, u rangïalehkai barim ka Madan SCC.
Haba phai sha ka jingïakhun, ka kylla step ka la kut ha kaba ym shym la don ba lah ban pynkhihjar, dei tad ynda la jam sha ka kylla miet ba u Phermanbha Lyngdoh (53′, 70′) u la pynkhihjar ar sien ryngkat bad ka shi kol jong u Medonbanshan Kurkalang (61′) kaba la pynthikna ïa ka Madan SCC ba kan khur pura ïa ki lai point.
Ka jingïakhun ha kane ka sngi Thohdieng kan long hapdeng ka Mawpat SC pyrshah ïa ka Pay For Right FA. Ka jingïalehkai kan sdang ha ka por 4 baje nohphai sngi ha madan First ground-SSA Stadium.
