Jowai, K.Lyngkot 16: Ka Hynñiewtrep Integrated Territorial Organization (HITO) Jowai Circle kala pynpaw ka jingsngewnguh halor ka jingpynlong ïaka ‘6th Meghalaya Game’ mynta u snem 2025 hapoh ka West Jaiñtia Hills.
Na ka liang ka seng ka pynpaw ka jingsngewkmen wat hapdeng ki jingduna ka sorkar kala ïaleh katba lah ban pynïaid beit ïa kane ka jingïalehkai khnang ban lait na kino kino ki jingthut naduh ka rukom pynbha pynmiat ïa ki madan ïalehkai bad ki Dorbar Hall.
Ka seng ka buh ruh ka jingkyntu ïa ki bor District ba kin sngewbha ban pynbiang katba lah ïa ki jingdonkam jong ki nongwan ïashim bynta naduh ka bam ka dih, ki jaka sah bad kiwei de ki jingdonkam jong ki khynnah ïalehkai kynthuh ïa ki Volunteer naka bynta ka bai nongsngi bad ka bai bam jong ki.
Kumba long ha ki snem kiba la dep pynlong ïaka Meghalaya Games ha Ri-Lum Garo (Tura), kaba sngewsih ka long ki don shibun ki jingeh ïa ki nongïalehkai. Khnang ban nym jia kum kine ka seng haka jinglamkhmat u President Owansaki Paswet ryngkat u General Secretary Deibormi Siangbood kila buh ka jingkyntu ïa u Deputy Commissioner ka District ba un peit bniah bad ban pynïaid beit shakhmat da ka jingïatreilang jong baroh ki nongshong shnong.
Haka juh ka por ka jingwan kane ka Meghalaya Games kan wanrah ruh ïa ka burom jong ka sor Jowai kaba dei ka Headquarter bad ïa ka burom jong ka District hi baroh kawei, la ong ka seng.
Haka juh ka por ka HITO ka ai khublei ïaka sorkar kala la lah ban pynlong ïa kane ka Meghalaya Games ha Jowai bad la kyrpad ïa ki paidbah nongshong shnong ka District ba kin long kiba kloi ban ïarap ïa ki briew kiba wan na kiwei pat ki District.
