Khur jingjop ka FSB bad ka Momentum ha ka SCA Cricket League Third Division

0

Shillong, Kyllalyngkot 16: Ka FSB bad ka Momentum ki la ïoh ban khur ïa ka jingjop ha k ar tylli ki jingïalehkai ka lympung SCA Shillong Cricket League ha ka kyrdan Third Division ba la pynïaid da ka Shillong Cricket Association ha madan Urkaliar, Shillong hynne ka sngi Palei. Ka FSB ka la pynliem ïa ka SCA (A) da 36 ron, nangta ka Momentum ka la jop ïa ka Dynamite CC da 8 ron.
Ha ka jingïalehkai kaba nyngkong, ka FSB ka la jied ban tied nyngkong hadien ba jop ïam ka toss, ha kaba ka la lah ba kan kamai 193 ron bad khyllem 9 wiket naki 20 over ba la mang. U Vishal Warjri u la seisoh bha ha ka tied da kaba kamai 61 ron naki 31 bol, bud sa u Sandip Paul u ba la ïarap 31 ron naki 13 bol.
Na ka liang ki rangkawangbol ka liang pyrshah kiba la seisoh ki long u Saktiam Hajong (4 over: shah tied 38 ron: khur 4 wiket) bad u Amul Kumar (4 over: shah tied 18 ron: khur 2 wiket).
Haba pyrshang beh ïa katei ka thong ba la buh ka SCA (A) ka la ïohlad ban kynjoh tang 157 ron bad hap 7 wiket naki 20 over ba la mang, watla u Prince Ray (74 ron naki 45 bol) bad u Sagar Solanki (21 ron naki 20 bol0 ki la kyrshan borbah hynrei kim shym la lah ban pynpoi sha ka thong ïa ka kynhun.
Nalor ba u la seisoh bha ha ka tied, u Vishal Warjri (61 ron) u la lah ban seisoh ruh ha ka bol da kaba khur 2 wiket naki 4 over bad ailad tang 30 ron ban shah tied, kaba la ïarap ïa ka kynhun ban jop da 36 ron bad ban khur syndon ïa ka nam ‘Player of the match’.
Ha ka jingïalehkai kaba bud, ka Momentum ka la kamai haduh 201 ron, khyllem 8 wiket naki 20 over hadien ba ka la jop ïa ka toss bad jied ban tied nyngkong. U Hamid Sohtun (37 ron naki 26 bol) bad u Wansuklang Shullai (36 ron naki 15 bol) ki dei ki nongtied kiba la kamai bun ron ïa ka kynhun.
Haba phai sha ka liang ki rangkawangbol ka liang pyrshah kiba la seisoh ki long u Mukesh Rai (4 over: shah tied 40 ron: khur 3 wiket) bad u Luther Sangma (4 over: shah tied 21 ron: khur 2 wiket).
Haba pyrshang jubab ka Dynamite ka la ïoh ba kan tied tang 193 ron naki 20 over ba la mang bad khyllem 7 wiket, u Abhijit Roy u la kamai 57 ron naki 45 bol, katba u Brewill A Sangma u la kamai 39 ron naki 22 bol. U Jied Lyngdoh u la khur 2 wiket naki 3 over bad shah tied 23 ron, katba u Hamid Sohtun u la khur 2 wiket naki 4 over bad shah tied 39 ron kaba la ïarap ïa ka Momentum ban jop da 8 ron.
ïa ka nam Player of the match la khur da u Hamid Sohtun u ba la kamai 37 ron ha ka tied bad khur 2 wiket ha ka bol.

Leave A Reply

Your email address will not be published.