Sngewkhia ka Raid bad ki seng ba dang kharoi ki nong Bangla ha ka Raid Amjong

Nongpoh, Ïaiong 13: Ki Nongïalam ka Raid Amjong ba hap hapoh ka jingpeit jingkhmih u Syiem Hima Khyriem da ka jingkyrshan jong ki 3 tylli ki Seng bhalang na Ri Bhoi ha ka Sngi Ba-ar jong ka taiew ki la hiar sha ka Raid Amjong ban leit jurip ïa ki Shnong basah da ki nong Bangladesh, kaba dei ruh ka jing sngewkhia ba kat dang mih ki sngi bad ki snem ka jingbun paid kitei ki Khar Bangladesh ki la dang roi khlem da don kano kano ka jingpyr khing da ka Hima bad ruh na ka Khasi Hills Autonomous District Council.
Kine ki 3 seng ba kynthup ïa ka seng HYC, Ri Bhoi, ka seng MPUF Ri Bhoi bad ka Seng MPSO, Ri Bhoi ki la hiar ban leit jurip sha kitei ki shnong, ka dei hadien ba ki la ioh jingtip na ki paidbah bad ki nongïalam Raid halor ka jingdang kiew ki jingbun paid kitei ki nong Bangladesh ha Amdubighat bad ha Panbari, kiba dei ki shnong shong ba sah da ki nong Bangladesh.
Kumba la pynpaw da ki nongïalam Raid ka Raid Amjong bad ki riew rangbah, ki nong Bangla ki dei kiba la wan shong wan sah naduh u snem 1963 kum ki nongphet wir ba la ai bor da u Syiem Hima Khyrim ha kawei ka jaka ba la tip kum ka Refugee Colony ha kaba ha kitei ki por ki dan duna bha ka jingbun paid, hynrei katba dang mih ki sngi bad ki snem kine ki la dang kiew ka jingbun paid ha kaba mynta lei lei la mih sa kawei ka Shnong ba la tip kum ka Panbari ba la shong la sah da ki khlem kano kano ka jingioh jingbit na ka Raid ne ka Hima.
Ki nongïalam Raid ki la ïathuh ruh ba ha utei u snem ki don tang kumba 40 tylli ki tnum ïing kum kita ki nongpoi wir ban wan sah shipor ba la ai bor da ka Hima, hynrei mynta ha kane ka Refugee Colony hajan ka Shnong Amdubighat ki la poi sha ka 100 tylli ki tnum ïing bad kawei pat ka shnong ba dang mih thymmai ka dei ka shnong Panbari ha kaba ki la don haduh 15 ïing ba la shu wan shong wan sah beaiñ khlem ka jingbit na ka Shnong, ka Raid, ka Hima bad wat na ka District Council.
Ha kane ka sngi, kitei ki 3 tylli ki seng Bhalang haba hiar ban leit jurip sha kitei ki shnong, ki la pynlong shuwa ïaka jingïalang ha Shnong Amjong ban tip ïaka jingshisha halor katei ka jingwansah buhai shnong jong kitei ki briew kiba la tip ba ki dei ki nong Bangladesh bad na ka liang ki nongïalam Raid ki la pynpaw ba kim tip satia halor katei ka jingwan sah kitei ki briew ba la don mynta la kumba 60 snem ei ei.
Lyngba jong kane ka sngi, ki nongïalam sengbhalang bad ryngkat ki nongïalam Shnong ki la leit sha katei ka jaka kaba don kitei ki nong Bangladesh ïa kaba la tip kum ka Shnong Panbari ban lum jingtip na ki tymmen ki san kiba la wan sah naduh kitei ki snem bad hapdeng jong katei ka jingïakren uwei u rangbah briew uba lah noh ka rta u la sei bad pyni ïaki kot ki sla kiba la aibor da u Syiem ka Hima Khyriem bad ba kitei ki briew ki ju leit ban pynthymmai ïa kitei ki kot ki sla man la u snem sha u Syiem ka Hima Khyriem, ong utei u rangbah.
Namar kata, ki nongïalam ka Raid Amjong bad ryngkat ki nongïalam kitei ki 3 tylli ki Seng Bhalang hadienba ki la ioh jingtip halor ka jinglong jingman kitei ki nong Bangladesh, ki la buh ka jingdawa na u Syiem ka Hima Khyriem bad ki bor District Council ba kine ki briew ki dei ban hap hapoh ka jingpeit jingkhmih ka Shnong ryngkat ka Raid, namar lada ailad ba kin don la u jong u nongïalam kumba long mynshuwa kan sa poi ka por ba kin sa leh trai khlieh hapoh kitei ki shnong, ki la bynrap.