La pynlong ïa ka “Stakeholders Meet” ban kyrshan ïa ki nongthaiñ jaiñ bad nongshna kti

Shillong, ïaïong: ïa ka “Stakeholders Meet” lane ka jingïakynduh bad jingïamir jingmut lang jong ki tnat treikam bapher bapher jong ka sorkar Meghalaya na ka bynta ban ïatreilang, ban kyrshan bad ban ïarap ïa ki nongthaiñ jaiñ (Handloom weavers) bad ki nongshna kti da kisiej (handicrafts) ba la khot da ka North Eastern Handlooms & Handicrafts Corporation Ltd (NHHDC), Govt. of India enterprise kaba hap hapoh ka ministry of DoNER, Guwahati la pynlong ha ka 12 tarik mynta u bnai ha Shillong Club.
ïa kane ka prokram la pynbit pynbiang da ka Meg halaya Social Development Society (MSDS),Shillong. Haba aijingkren ha kane ka sngi, kaTribeni Saikia, Manager NHHDC, i/c Livelihood and entrepreneur division ka la pynpaw ba ka kam jong ka NHHDC ka long ban wanrah ïa ka jinglah ban pynïaid ïew ïa ki jaiñ kiba ki pynmih ne ïa ki jingshna jong ki bad ka skhim ka sorkar pdeng ka ba tip “Invest India” lyngba ODOP (One District One Product) kaba mut tang kawei ka jingpynmih na kawei ka district kum ban shu ai nuksa ka”Gamosa” ha Assam.
Ka la ong ruh ba ka la don ka jingïatreilang bad kiwei ki kynhun treimon sngewbha ha kaba lyngba jong ki ka ïoh shibun ki jingtip kaba ki lah ban ïaid shakhmat ha ki kam jong ki. Nalor kata ka la ong ruh ba ka NHHDC ka don la ka jong ka tnat kaba dei peit ban pynbha bad ban pynitynnat ïa ki tiar ba pynmih da ki nongshnakti ne ki jaiñ ba ki thaiñ ban pynïaid ïew ïa ki lyngba ka online market ne e-commerce kaba kynthup ia ka Amazon, Flipkart bad Indiamart.
Shuh shuh ka la ong ba ka jingthmu jong ka NHHDC ka long ban kner ka kti ban ïarap ha kaba ïadei bad ka ïew ka hat tang ïa kito ki nongthaiñ jaiñ ne nongshnakti kiba la soi soskular bad ka ha kaba ki lah ban pynrung ïa ki mar ki mata ne ki jaiñ ba la dep thaiñ ha ka mobile app jongka NHHDC. Kaba ar ban kyntiew bad ban pyntbit shuh shuh ïa ki sap ki phong ba ki don. Bad kaba lai ban kyntiew shuh shuh ïa ka kamai kajih jong ki. Ka la ong ruh ba ka NHHDC ka don ïa ki jaka pynïaid ne die (sale outlet) ïa ki mar ki mata ha man la ki jaka jong ka North East halor ka ODOP.
Ha shilynter ka jingïamir bad phylliew jingmut jong ki tnat treikam jong ki Sorkar Jylla bapher bapher kiba kynthup ïa ka tnat Sericulture / Textile, District Commerce & Industries Centre (DCIC), State Office, Khadi & Village Industries Commission (KVIC), MBMA/MBDA, DBDU (District Basin Development Unit) EKH, NCERT, JSS, MIMDI, MSRLS/NRLM, ha kaba ki pynpaw ïa ka jingdonkam ban kyntiew shuh shuh ïa ki sap ki phong (skill up-gradation training) da kaba wanrah ïa ki jinghikai kiba thymmai ban pynitynnat bad pynwandur (latest designing) shuh shuh ïa ki jaiñ ne ki mar ki mata jong ki ryngkat ka jingpynïaid iew (market linkages) da kaba ki nongthaiñ jaiñ bad ki nongshnakti kin shim ïa ka lad jingïarap lyngba ka skim sorkar ryngkat ka subsidy kaba tip kum ka PMEGP na ka ophis ka KVIC, DCIC bad KVIB. Shuwa jong kane ka sngi ka la don ka jingïakynduh lang jong ki longkmie/ kynthei kiba seng bad treikam lajong bapher bapher ha kaba la ïohsngew na ki ïa ki jingeh kiba ki ïakynduh ha ki kam kiba ki trei bad kiei ki lad jingïarap na ka bynta jong ki.