Nongpoh, Jylliew 16: Ka skulbah University of Science & Technology Meghalaya (USTM), mynta ka sngi ka la pynïeng da ka lama lai rong kaba jrong tam ha ka jylla kaba don kumba 150 phut, ha Knowledge Park kaba don ha phyllaw jong katei ka skulbah.
Katei ka sienjam ban pynieng da katei ka lama lai rong kaba jrong tam ha ka jylla ka dei lyngba ka jingïatreilang bad ka DK Flag Foundation, Mumbai hapoh ka jingïalam u Dr. Rakesh Bakshi u ba la ju tip ruh kum u flagman of India.
Ha kane ka sngi la sakhi ruh da ka jingdonlang u Anil Bisht, DIG, CRPF, Orville Massar, Additional Superintendent of Police, Ri-Bhoi, Mahbubul Hoque, Hon’ble Chancellor, USTM, Dr. Sanjay Deshmukh, Former Vice-Chancellor, University of Mumbai, Prof. G. D. Sharma, Hon’ble Vice-Chancellor, USTM, ki NCC cadets jong ka USTM, ka kynhun tem jong ka 1st MLP Battalion, ki samla pule, ki nonghikai lem bad kiwei kiwei ki riew rangbah.
U Mahbubul Hoque kum u Chancellor katei ka skulbah u la ai khublei ïa ka DK Flag Foundation kaba la shim ïa ka sienjam ban pynïeng ïa katei ka lama lai rong ha katei ka skulbah, kum kawei na ki lama India kaba jrong tam ha ka thaiñ.
