Nongstoiñ, Jylliew 16: Ka Deputy Commissioner Eastern West Khasi Hills District, ka la buh ïa ka jingpyrkhing kaba tyngeh ïa baroh ki trai kali bad ki nongpynïaid kali, khamtam ki kali heh kiba ju kit ïa ki mar kiba ju ïaid sha ki jaka khappud bad sha ki jaka kiba kham pajih na sor, kiba ju ïaid sahuh khlem ki kot ki sla kiba biang bad khlem da don ïa ka High Security Registration Plates (HSRP) ka plate number ba la ithuh da ka sorkar.
Kine ki HSRP dei ban pyndait na shakhmat bad na sha kynriang jong ka bynta ba shadien jong ka kali, kumba ju dei ka rukom ban hap ban leh katkum ka Rule 50 jong ka Central Motor Vehicles Rules, 1989 bad katkum ka jingbthah na ka Ïingbishar ba don burom jong ka ri India, ka Supreme Court.
Namarkata, baroh ki trai kali bad ki nongpynïaid ïa ki kali, la bthah ïa ki ban pyntikna ba baroh ki kali kamai kiba ju ïaid ha ki surok ki ba hap hapoh ka Eastern West Khasi Hills District, ba ki dei ban don ïa Certificate of Fitness lane ka certificate kaba pynshisha ba ka kali jong ki, la ka dang bïang ne em ban ïaid ha surok kaba long katkum ka kyndon aiñ 56 jong ka Motor Vehicle Act, 1988 bad ki nongñiah kali ki dei ruh ban bud ryntih ïa ki aiñ khlem da pynkheiñ aiñ haka por ba ki ñiah kali.
Baroh ki kali ki dei ban don ïa ka valid Pollution Under Control Certificate (PUC) katkum ka jingbthah hapoh ka kyndon aiñ 190(2) jong ka Motor Vehicles Act, 1988 kynthup ïa ka Rule 115 jong ka Central Motor Vehicle Rules, 1989.
Shuh shuh, la bthah ïa baroh ki nongñiah kali bad ki nongpynïaid kali ba ki dei ban rah lang ïa ki kot kali kum ka Registration Certificate, ka Insurance Certificate, PUC Certificate, Driving License jong u nongñiah bad kiwei de ki kot donkam katkum ba la bthah ha ka Motor Vehicle Act, 1988.
Baroh ki kali ki dei ban pyndait da ka High Security Registration Plates (HSRP) ha ka bynta ba shakhmat bad ha ka bynta ba shadien jong ka kali, kaba long katkum ba la bthah ha ka Rule 50 jong ka Central Motor Vehicles Rules, 1989.
Shuh shuh, la buh ruh ka jingpyrkhing ban nym shah ïano ïano ban shna pynheh ïa ka body jong ka kali la ki dei ki kali rit ne ki kali heh. La leh ïa kane hadien ka jinglap ba don bun ki kali kiba la shna hi ban pynheh ïa ka body jong ka kali, khlem da ïoh jingbit, kum ka jingjrong, ka lynter bad ka pyngkiang jong ka body ka kali.
Kane ka jingshna beaiñ ïa ka body jong ki kali ka long kum ka jingpynkheiñ ïa ka kyndon aiñ 52 jong ka Motor Vehicle Act 1988 bad ka Rules 93 jong ka Central Motor Vehicles Rules, 1989 bad ha kajuh ka por kane ka rukom shna pynheh ïa ka body ka buh jingma ruh ïa ka kali bad ïa kiwei pat ki kali ha ka por ba ïaid ha ka surok.
Kumta, la bthah ïa baroh ki trai kali, bad ki nongpynïaid kali ba lada don ki kali kiba ki la dep ban pynkylla thymmai ïa ka body jong ka kali, ba ki dei ban pynkylla biang kumjuh kumba ka wan na ki trai nongpynmih kali.
Kumjuh ruh kito ki trai kali kiba kwah ban thied tang ïa ka chessis jong ka kali kum ki trok, bos, ki dei ban pan jingbit shwa na u District Transport Officer ha shuwa ban shna ïa ka body jong ka kali.
Baroh ki trai kali, ki nongpynïaid ïa ki kali, ki nongkhaïi, ki riew shimet la bthah ïa ki ban bud ryntih ïa baroh ki jingbthah. Lada lap ïa kino kino kiba pynkheiñ kin shah pynshitom katkum ki kyndon aiñ jong ka Motor Vehicle Act, 1988, kynthup ïa ka jinglah ban shah knieh noh ka kali ba ki ñiah, ka kuna bad wat haduh ban da shah set ha along lada I donkam.
