Nongstoiñ, Nailur 22: Ka Office jong ka District Medical & Health Officer (DMHO) West Khasi Hills District hapoh ka District Ayush Society, National Ayush Mission West Khasi Hills District, ha ryngkat ka jingïasnohktilang bad ka Meghalaya State Rural Livelihoods Society West Khasi Hills, ha ka sngi hatmajai 22 tarik Nailur 2026, ka la ïoh ban rakhe ïa ka jingdap nsme jong ka Ayush Mission naduh ba la pyntreikam ïa ka.
Ha kane ka sngi ba kyrpang, u bah Lurshai Kharbani MDC ka Rambrai Jyrngam Constituency u la long u kongsan ryngkat ka jingïasynran ka Cheysian N Sangma, MCS Assistant Deputy Commissioner ka West Khasi Hills District kum ka symbud kongsan, u Dr. M. Nongrum, District Nodal Officer (AYUSH), Dr. Banrilang Lyngkhoi (Ayush Medical Officer, APHP, NAM, Nongstoiñ CHC) Dr. Lasson Wahlang (Ayush Medical Officer, APHP, NAM, Rambrai PHC) bad kiwei kiwei.
Ha kane ka sngi la pynphuh pynphieng ïa ka jingrakhe da kaba pynlong ruh ïa ka jingïakop shet ïa ki jingdih jingbam khlem da pyndonkam ïa ka ding, ha kaba la ïohi ruh ba da ki phew ngut ki longkmie kiba na ka shnong Kyrdum ki la wan ban ïashimbynta shitrhem ha ka ban khleh ïa ki jhur im bad ïa ki Umsoh kiba tei met.
Nalor kata, la pynlong ruh ïa ka jingïakop dro dur bad ka jingïashimbynta lang ha ka jingleh YOGA ha kaba naduh ki khynnah skul bad ki longkmie longkpa ruh ki la ïashimbyntalang.
La ïoh sam ruh ïa ki khusnam sha ki nongjop bapher bapher, ha kaba ka kong Apsaralin Lyngdoh ka la rah ïa ka nam kaba nyngkong ha ka rukom khleh ïa ki jhur im, katba ka heprit Ribaciful Marweiñ ka la rah ïa ka namjop ba nyngkong ha ka jingïakop dro dur.
Ïa katei ka jingïalang la pynlong ha phyllaw jong ka skul Church of God LP & UP School Kyrdum, West Khasi Hills District bad la pynïaid ïa katei ka jingïalang da ka Dr. Kordor Thongni kum ka shongknor jong katei ka jingïalang.
