Mairang, Nailur 22: Ki skul bad ki college ki dei ki shlem aii jinghikai kiba don kam haduh katta katta hynrei ban seng ïa ki skul bad ki college ka dei ka kam kaba eh haduh katta katta. Kumba ka long mynta ki samla kiba la pyndep ïa ka jingpule jong ki haduh ka klass kaba khatar kiba don ka jingthrang ban bteng ïa ka jingpule sha ki kyrdan kiba kham halor lada ki dei ki samla kiba wan na ki long ïng longsem na kiba duk ba kyrduh kiba dei na ki shnong nongkyndong ki shem jingeh bha bad don kiba hap ban sangeh noh ïa ka jingpule jong ki.
Kaba sngewtynnad ka long ba ha ka shnong Mawkyllei kaba dei ka shnong kyndong kaba hap ha ka Mawthadraishan C & RD Block Eastern West Khasi hills district ka don kawei ka College kaba ka jingïaid lynti ka la kynjoh khathynriew snem haduh mynta.
Hadien ba la ïoh jingtip ïa ka jingdon jong katei ka college ha katei ka shnong u Nongthoh khubor jong u Mawphor ha kane ka sngi hatmajai ka 22 tarik Nailur u la hiar sha katei ka Collge bad la ïoh ban ïakynduh bad ïakren sani bha halor ka jinglong jingman jong katei ka shlem ai jinghikai.
Ha ka jingïakren bniah ban u Vice principal jong katei ka collge u la ïathuh ba ïa katei ka Colege la seng naduh ka 6 tarik u bnai Jylliew jong u snem 2011 bad ka la kynjoh mynta khathynriew snem naduh ba la seng ïa ka. Ha kajuh ka por u la ïathuh ruh ba ka jingseng ïa katei ka shlem ai jinghikai ka dei hadien ba ka dorbar shnong Mawkyllei ka la ïohi ba bun bah ki khynnah samla kiba la pyndep ïa ka klass kaba khatar ki shem jingeh ban bteng ïa ka jingpule jong ki da kaba leit sha ki jaka kiba jngai namar ba ki hap ban pynlut ka bai wai ïng nalor ba ka bai bai skul ruh kaba rem kumta ki kmie ki kpa ki shem jingeh haduh katta katta ban phah ïa ki khunba kin bteng ïa ka jingpule jong ki.
Shuh shuh u la ïthuh ba hadien ba ka dorbar shnong Mawkyllei ka la ïashong pyrkhat ka la ïakut ban seng ïa katei ka College bad da ka jingkyrshan borbah jong u (L) Maieit Hopingstone Lyngdoh katei ka jingthmu ka la urlong bad katei ka shlem ai jinghikai ka la ïaid shaphrang haduh kine ki sngi.
Ha kaba ïadei bad ka jinglong jingman jong katei ka College utei u Nonghikai u la ïathuh ba haduh mynta ym shym pat la ïoh kano kano ka jingïarap na ka sorkar hynrei ïa ka tulop jong ki Nonghikai la siew da kaba shu nohsynñiang da ki long ïng jong ka shnong baroh kawei bad na ka bai skul ba la pynmih da ki samla pule.
U la ïathuh ruh ba haduh mynta ki don palat khatphra ngut ki nongtrei ha katei ka shlem aijinghikai kynthup ïa ki non teaching staff bad ka jing don jong ki samla pule ka la kiew sha ka shispah sanphew ngut tam. Ha kajuh ka por u la ong ba ka jingdon jong katei ka Collge ha ka shnong Mawkyllei ka la long ka jingkyrkhu kaba khraw khmtam ïa ki samla ki ba dei na ki long ïng kiba duk ba kyrduh ki bym don lad bah phah sha kiwei pat ki jaka.
U la ong ruh ba ka long ka jingkyrkhu kaba khraw ïa ki samla jong katei ka thai namar ki dang ïoh lad ban sah lang bad ki kmie ki kpa ha la ïng la sem, ki dang ïoh lad ban leit trei leit ktah leit rep leit riang.
Shuh shuh u la ong ba ka jingtrei jingktah, ka rep ka riang, ka ri jingri kaba ki bud kat kum ka jingpule jong ki ka long shisha ka lad bad ka jingpyntbit kaba paka. Khatduh eh u la ong ba ki samla kiba pule ha katei ka Collge ki dei kiba dang don ka jingim shi sur bad kim pat kwah ban bud tynneng ïa ka rongphong kiwei la ka dei ha ka riam ka beit, ka bam ka dih, hynrei ki dang nang ban tyngkai ïa ka akor ka burom, ka jingim tipbriew tip blei bad ki don shisha ïa ka jinglong kaba khuid ha ka jingim jong ki.
