Rakhe ka ophis DM &HO ïa ka World No Tobacco Day ha St. Xavier College, Umoid

Mawkyrwat, ‘Nailur 22: Kum shi bynta jong ka jingrakhe ïa ka sngi ban pyrshah ïa u Duma ne ka World No Tobacco Day 2026, ka ophis jong u District Medical & Health Officer (DM&HO), South West Khasi Hills District, Mawkyrwat, mynta ka sngi ka la pynlong ïa ka prokram ha ryngkat ki nonghikai lem bad ki samla pule ha St. Xavier College, Umoid, South West Khasi Hills District.
Ha kane ka sngi, ïa ka prokram la pynïaid da ka Dr. Boundtiful Ramsiej, ryngkat bad ki jingkren na u Fr. Sunnyn Augustine, SJ uba dei u Principal jong ka St. Xavier College, Umoid, uba la batai halor ka jingdonkam ban rakhe ïa ka World No Tobacco Day bad ban pynsngewthuh paidbah ïa ki jingma kiba mih na ka jingpyndonkam ïa u duma bad kiwei kiwei ki jingdih ba sniew.
U Bah B. Kharjana, Additional Superintendent of Police, South West Khasi Hills District, Mawkyrwat ula kren halor ki jingma bad ki jingktah na ka jingpyndonkam ïa u duma bad u sikret ka lah ban wanrah ruh ka pyntroiñ ïa ka koit ka khiah jong ki briew. Ula batai ruh ïa ki lad ki lynti ban kiar bad ban teh lakam ïa ka jingpyndonkam ïa kine ki jingdih ba sniew.
Ha ka jingkren jong u, u la sam ruh ïa ka jingïakynduh shimet jong u, da kaba pynpaw ba naduh ba u dang khynnah u la lait na ka jingdih duma bad sikret, da kaba shim nuksa na u kpa jong u. U la ïathuh ruh ba ki paralok kiba la ïa leit skul lang ki ju khot ieid ïa u da ka kyrteng “No Smoking” namar ka jinglait jong u na ka jingdih sikret bad duma.
U Dr. P. Phyllei, Dental Surgeon, Ranikor CHC, u la batai bniah halor ki jinglong jingman bad ki jingktah kiba ka jingpyndonkam ïa u duma, sikret, raja, khaini bad kiwei kiwei ki jingpyndonkam ïa u duma ki lah ban wanrah ïa ka koit ka khiah kaba don ha ka jingma, khamtam ïa ka koit ka khiah jong ka shyntur bad ki bynta bapher bapher jong ka met ki briew.
Ha kajuh ka por, ula kyntu ïa ki samla pule ba kin jied ïa ka koit ka khiah bad ïa ka jingim kaba bha, bad ban kiar na ki jingmlien kiba sniew. U la pynpaw ba ka jingim ka kham kordor ban ïa u duma bad ki jingdih ba sniew, namar ka jingpyndonkam ïa u duma ka lah ban pynlyngkot ïa ka rta bad pyntroiñ ïa ka koit ka khiah jong ki briew. Namarkata, ula kyntu ba ym dei ban pynlut kai ne pynsyrwa ïa ka pisa ha ki jingdih kiba pynjot ïa ka met, hynrei ban pyndonkam ïa ka pisa ha ki jingbam bad ki jingdonkam kiba tei bad pynkhlaiñ ïa ka met.
U Ehbok Syiemlieh, na ka ophis jong ka District Sports Officer, South West Khasi Hills District, Mawkyrwat, u la kren halor ka jingktah jong ka jingpyndonkam ïa u duma bad sikret ïa ka met ka phad jong ki briew kaba ïa dei bad ki kam ïalehkai sports. Ula pynshai ba ka jingpyndonkam ïa kine ki jingdih ba sniew ka lah ruh ban ktah ïa ka met bad ka bor met jong ki nongïalehkai, bad ka lah ruh ban pynhiar dor ïa ka jinglah jong ki ban shimbynta ha ki jingïalehkai bapher bapher.
Ha kajuh ka por, u Bah Rickle Marngar ula kren halor ka Substance Abuse, kata ka jingpyndonkam bakla ïa ki kynja jingdih kiba poi sha ka jingpynsniew. Ula pynpaw ba ka jingmlien bad jingkyrni ha kine ki jingdih ka lah ban wanrah ïa ka jingjot ïa ka koit ka khiah bad ïa ka jingim jong ki briew, bad ha ki khep kiba la poi sha ka jingkyrni lei lei, ka lah ban poi wat haduh ka jingïap.