Da ki lak tyngka shah ktah kawei ka longïing na ka jingpluh ïing ha Lai lyngdoh Amlarem

Jowai, Ïaïong 13: Kawei na ki jingjia pluhïing kaba la jia ha ka shnong Lai Lyngdoh Amlarem ha ka por kumta 11 baje mynmiet jong ka 12 tarik u Ïaïong bad katei ka ïing kaba dei trai da ka kong Dulimai Pohtam kala shah bam duh ha ka ding kaba klang.
La ïathuh ba ka ding ka la sdang na ka kamra shet ja bad pur kylleng ka ïing kaba don 9 kamra bad kiba shah ktah eh ïa ki 3 tylli ki kamra ïing kiba la shah bam duh bad 1 kamra ka dei ka Dukan.
Wat ïa ka pisa kaba don kumba 30 Hajar kala shah bam ha ka ding kynthup lang ïa ki khiew ki pliang, ki jaiñ ki nep bad baroh ki tiar kiba don hapoh ïing. Kumjuh ïa ki School Certificate jong ka Dulimai Pohtam bad ki khun, ka Silma Pohtam (para), ki Land document, Bank passbook, Office (SSA) documents: UC & Order, baroh ki jinglut na kane ka jingpluh ding kala poi sha ka 10 lak.
Halor kane u ma K. Pohshna Advise Synjuk Ki Waheh Shnong War Jaiñtia Amlarem u kyrpad jur ïa ki bor sorkar da kaba phah ïa ka shithi sha ka Sub-Divisional Officer (Civil) Amlarem Sub-Division ba kin wad ki lad ki lynti lyngba ka Block bad sha ka DRDA West Jaiñtia Hills ban ïarap kloi ha kine ki sngi namar katei ka longïing ki long ki briew kiba duna ha ka ïoh ka kot.
Ha ka juh ka por la phah copy kumjuh sha Sha u Deputy Commissioner West Jaiñtia Hills District, Jowai bad sha u ma Lahkmen Rymbui, Local MLA 7-Amlarem, Chief Adviser ka sorkar jylla ba kin ïoh ban ïarap lem ïa katei ka longïing. Ha ka kajuh ka por la ujor ejahar ruh sha u Officer In-charge, Amlarem Police Station ban ïoh leh ïa kaba donkam.