Nongpoh, Ïaiong 13: Kum kawei na ka thong ban kyntiew ïa ka jingnang jingstad ki heprit ha ka shnong khappud ka Meghalaya ba hap hapoh ka Raid Nongtung ha Ri Bhoi District, ki nongïalam ka RBYF Sengkmie bad na ka RBYF Raid Nongtung Circle ha ka sngi Balang jong ka taiew ka la hiar sha ka Shnong Ummat-2 na ka bynta ban ai jingïarap da ki Ben bad ki Desk sha kawei ka skulk aba don hapoh ka Shnong Ummat-2, ka shnong khappud ha Ri Bhoi ba dang ïa kajia pud hapdeng ka Meghalaya bad ka Assam.
Kane ka skulk aba la ioh pdiang ïa kine ki lad jingïarap da ki Ben bad ki Desk lyngba ka seng RBYF ka dei ka skul St. Joseph English Medium School, kaba la shna da ka Shnoing bad kyrshan lang da ki paidbah na ka bynta ban kyntiew ïa ka pule ka puthi ki heprit hapoh katei ka thaiñ Ummat.
Haba leit ai jingïarap sha katei ka skul da ki Ben bad ki Desk da ka jingïalam u Bah Neverson Makdoh kum u nongïalam ka sengkmie bad la sakhi lang ruh daka jingdon lang u Bah Shining Shadap, General Secretary ka RBYF Raid Nongtung Circle, u Bah P. Makri, Rangbah Shnong ka Ummat-2 bad kynthup ruh ki riew rangbah bad ki khynnah skul bad ki nonghikai katei ka skul.
Lyngba jong kane ka sngi ka la long ruh ka sngi kaba kmen bha naduh ki nonghikai bad ki khynnah skul katei ka skul St. Jospeh English Medium School, namar ka dei ka skul kaba dang donshibun ki lad jingïarap na ki riew kylluid mynsiem bad na ka sorkar ban kyntiew ïa ka pule ka puthi ki heprit hapoh katei ka shnong khappud.
Tang ban kyntiew ïa ka pule ka puthi bad ban ai jingnang jingstad ïa kane ka skul, ki kmie ki kpa ki hap ruh ban siew T. 150 shi bnai khnang ban ïarap ïa ki bor pynïaid katei ka skul ban dang kyntiew shaphrang ïa katei ka skul pule ba ki heprit na katei ka thain kin ioh ban lum ïa ka jingnang jingstad.
Kitei ki nongïalam ka RBYF lyngba u Bah Neverson Makdoh ruh ha kane ka sngi ki la ai khublei ïa ka bor shnong, ki nonghikai bad ki paidbah, namar dei ka jingïatrei lang jong ki ba la lah ba seng ïa kane ka skul ban ai jingnang jingstad ïa ki heprit hapoh katei ka shnong.
Namarkata, ki nongïalam ka RBYF ha kane ka sngi ki la buh ruh ka jingkyrpad sha ka bor sorkar jong ka jylla Meghalaya ba kin phai khmat lem sha katei ka skul bad kiwei kiwei ki kam pynroi, namar kumba long haduh kine ki sngi katei ka shnong ka dang donkam shibun ki kam pynroi khnang ban bit ban biang ki paidbah nongshnong shnong ha kitei ki shnong khappud.
