Nongpoh, Ïaiong 13: Ki nongïalam ka Confederation of Ri Bhoi People (CoRP) mynta ka sngi ki la kynnoh ba ki Doctor jong ka Civil Hospital Nongpoh kim shem la shim khia ban sumar bha ïa uwei u samla ba la 20 snem ka rt ana ka shnong Umkra hadien ba u la leit sha sumar na ka jingmynsaw.
Kane ka jingkynnoh ka la mih pyrshah ïa ki Doctor ka Civil Hospital Nongpoh, ka dei hadien ba ki nongïalam ka CoRP ki la ioh jingujor na ki kmie ki kpa jong utei u samla, uba la leit ban shah sumar ha katei ka Hospital naduh ka 11 tarik u Ïaiong 2023 ha kaba utei u samla u la shu thiah ha ka jingthiah khlem da sumar da ki Doctor.
La kynnoh ruh ba ki Doctor ki la tip ba ula don hapdeng ka jingshitom na ka jingmynsaw, hynrei kim shym la peit la khmih ban sumar bad kim shym la leh ruh wat ïa ka X-ray wat lada u la ud ba u don ka jingshistom ha ki bynta jong ka shadem na ka jingshah bom shah shoh.
Halor kane ka jingjia, ki nongïalam ka CoRP ha ka jingïalam u Bah Pateng Myrsing kum u Working President ka CoRP, u Bah Pateng Myrsing ki la leit ruh ba ïa kynduh ïa u Nongpang khnang ban tip ïa ka jingshisha bad kumba la phla da utei u nongpang ruh ba ki Doctor ki la leh sting bha khlem da pyrwa ïa katei ka jingshitom jong u.
Na ka liang ka seng ka la pynrem jur ruh halor kane ka jingkhein sting ki Doctor ban sumar ïa utei u samla tad haduh ba ki hap ban sei noh ïa u na katei ka jaka ai jingsumar ban leit shah sumar shawei bad ka seng ka la maham ruh ba kan dang bundien ïa kum kine ki jingjia bad lada ka lap nangne shakhmat kam banse ban shim da kiwei ki lad ki lynti ba tyngeh, namar ka jingdon katei ka Hospital ka dei ban ioh jingmyntoi ki nongpang bad ym ba ki nongpang kin shu wan shah sumar khlem da kit khiah da ki Doctor ne ki Nurse, bynrap u Bah Pateng Myrsing.
