Mawkyrwat, ‘Nailur, 22: Ka Hynñiewtrep Achick National Movement (HANM) South West Khasi Hills District ka pynpaw ïa ka jingsngewsih ba ki marbam mardih hapoh ka jylla ka la kiew shaba palat ha manla ki distrik.
Ha u kyrwoh ba la phah da President ka seng u Bah Lambokstar Marweiñ, u la ong ka jingnang kiew dor jong ki marbam ka la long la jan manla ka sngi ha ki ïew ki hat bad kane ka wanrah jingeh nyngkong eh ïa ki baduk basuk, ïa ki khun-swet khun-rangli bad ïa ki bym biang ka bylla, ka sngi bad khamtam ka wanrah jingeh ïa ki longïing longsem kiba shem jynjar.
U la ong ruh ba ka jingkiew dor ka long kum u khaw ha ki snem ba ladep dang poi tang T. 1200 lane T. 1300 hynrei mynta u kiewdor haduh T. 1700 lane T. 1850 shi byrni, ka umphiang bam mynshwa ka poi T. 90 shi 1 litar mynta pat T. 120 shi litar bad kiwei de ki mar ki la nangkiew dor manla ka por.
“Balei ki nongmihkhmat jong ngi kim ju kynmaw ïa kine ki jingeh jong kiba duk,” la buh jingkylli u Bah Lambokstar ïa ki nongmihkhmat ki bym shym la kren eiei ïa ka jingeh jong ki duk ki suk.
