Shillong, Nailur, 22: Kumba 100 ngut ki nongrep jong ka Krang Circle ki la ïashim bynta ha ka jingai jinghikai ba la pynlong da ka Khasi-Jaiñtia Farmers’ Association (KJFA) Krang Circle ha ka shnong Krang ha ka sngi Balang.
Ki nongai ai jinghikai ki long ka Horticulture Development Officer jong ka Mawphlang Block ka Kong Salva Buhroy bad Assistant Technology Manager (ATMA), Sohïong Block ka Kong Nisha V. Kharjana ryngkat ka jingdonlang jong u Horticulture Inspector, Mawphlang Block u Bah T. Mawlong
Ka Kong Salva ka la ïasyllok bad ki nongrep halor kumno ban rep ïa u Soh Kiwi uba remdor bha, uba suk ban rep bad uba ïadei bha bad ki jaka khriat kum ha Sohïong, Nongthliew, Krang bad ha kiwei kiwei ki jaka kiba khriat. La hikai ruh ban rep jhur Sohmynken ha ki iing plastik ban ïoh kheit kham bun bad lah ban ïoh plastik ha ka dor Subsidy na Horticulture hi bad kumno ban rep Soh Plom ha ki buit ba kham bha ban ïoh soh kham bha bad kham bun.
Ka Kong Nisha ka ai jingbatai kaba shai bad kaba bniah bha ïa ka rukom rep kba ban lait na ka jingduhei ba kem jingpang, bam khniang bad ka rukom ba kham bha naduh ki symbai ban thung bad ban sara janai bha ha pynthor ryngkat ka jingdonkam ka um bad ka sboh ba la pyndonkam.
Ka la kyntu jur ban pyndonkam suki suki da ki Bio-Fertilizers (sboh ñiut) ha ka jaka jong ki Chemical Fertilizers (sboh dawai phareng) kiba la lap ba ki don jingma ïa ka jingkoit jingkhiah u briew bad wat ïa ki khñiang kiba pynbha ïa ki jingthung jingtep kiba don ha ka khyndew.
Ka la ai jinghikai ruh kumno ban shna ïa ka sboh 18 sngi da ki nongrep ha ka la ki shnong bad ki jaka rep ban ïarap ban ïoh sboh lade bad kham pynduna na jinglutksan ban thied shi thied sboh.
Ïa kane ka jingai jinghikai la ïarap da ka Meghalaya Farmers’ Commission (MFC) ban kyntiew ïa ki nongrep ban tip ïa ki buit rep bathymmai.
