Shillong, Nailur 22 : Jan kumba 500 ngut ki Nongrep ki la ïoh jinghikai pyntbit bad ki la ïa rep mynta ïa ki jingthung jingtep tang da ka sboh khyndew ba shna hi (natural farming) ha ki 25 tylli ki Shnong katba ka Sorkar ka dang ap ïa ka jingmynjur ka Sorkar Pdeng ban nang pynïar ïa kane ka kam rep hapoh ka Jylla.
ïa kane la pyntip da ka Myntri ka kam rep Kong Ampareen Lyngdoh haba jubab ïa ka jingïatai ba lyngkot ba la wanrah da u MLA ka UDP na Nongpoh Bah Mayralborn Syiem, ha ka sngi khatduh jong ka Dorbar Synrai ka ïing Dorbar Thaw Aiñ ka Jylla hynne ka sngi Thohdieng.
Ka Kong Ampareen ka la pyntip ba ka Meghalaya State Rural Livelihood Society (MSRLS) ka la wanrah ïa ka jingai jinghikai halor ka rep tang da ka sboh khyndew ha kylleng ki jaka ka Jylla. Ki la ïateklok bad ki riewshemphang na Andhra Pradesh bad kila buh haduh 18 tylli ki Farmers Field School bad ki la ai jinghikai ruh ïa palat 35 ngut ki Community Resource Person (CRP) ki ban leit ai jinghikai ïa ki nongrep ba kin sdang ïa kane ka kam rep.
Ka Myntri ka pyntip ba palat 475 ngut ki nongrep ki la pyndep ïa ka jinghikai haduh mynta bad kila sdang ïa ka rep tang da ka sboh khyndew ïa ki jingthung jingtep ha ki 500 acres ka jaka ha ki 25 tylli ki Shnong. Hapoh kane ka prokram, ka MSRLS ka la buh ruh ïa 380 tylli ki Multi Cropped Kitchen Garden.
Ka Kong Ampareen ka pyntip ba ka Tnad ka la phah pyntip ïa ka Annual Action Plan ïa ka kam rep tang da ka sboh khyndew sha ka Sorkar India ba kan ai jingmynjur.
“Lada mynjur, ka Tnad kan pyntreikam ïa kane ka skhim kat kum ka kyndon jong ka National Natural Farming bad nang pynbun ïa ki jaka ban rep ïa kane ka rukom rep hapoh ka Jylla” ka la bynrap.
Haba pynpaw ka kam rep khlem ai dawai chemical lane Organic Farming, ka dei kawei pat ka lynti kaba la pynshlur bha hapoh ka Jylla, ka Myntri ka ong, kumba long mynta, haduh 32000 hectare ka jaka ka la don hapoh kane ka rukom rep bad ka Sorkar ka dang plan ban bynrap sa 50,000 hectare hapoh u 2030.
“Kine ki rukom rep kin ym ktah ïa ka jingsboh jong ka khyndew bad kan kyntiew ruh ïa ka jingpynmih ïa ki marrep, ki marrep ki dei ruh kiba ïarap ïa ka koit ka khiah ki nongbam bad nongpynmih bad ka pynïoh ruh kham bun ka kamai kajih ïa ki nongrep” kala ong.
Halor kine ki kam rep hapoh ka Jylla, ka Kong Ampareen ka la pyntip ba ka Tnad kala pyntreikam ïa ka Mission Organic for Value Chain Development-North East Region (MOVCDNER) ba la bei tyngka da ka Sorkar Pdeng ha kaba haduh 28 tyli ki FPO la dep ban buh bad kila rep da ka rep khlem ai dawai chemical.
Ka pyntip ba ka Kynhun Myntri ka Sorkar Jylla ruh ka la mynjur ïa ka Meghalaya State Organic and Natural Farming Policy ha ka 11 tarik Kyllalyngkot 2023.
Ka ong ruh ba da ka jingthaw ïa ka Meghalaya’s Natural and Organic Society for Livelihood and Innovation in Agriculture (MEGNOLIA), ka dei ka sienjam ba kongsan bha ha ka lynti ïaid jong ka Jylla ban long ka nongïalam ha ka jingpynmih ïa ki marrep ba khlem khleh dawai hapoh ka Ri.
