Ujor ba pyndonkam ka sorkar da ka polisi thung kam ha ka jingleit pule Laiñ

Shillong, Jymmang 24 : Ka ïing Bishar High Court jongka jylla ka la pdiang ïa ka jingpan por jongka sorkar jylla ban ai jubab halor ka mukotduma PIL ba la ujor da u MLA ka VPP u bah Adelbert Nongrim halor ka jingpyndonkam jongka sorkar da ka polisi thung kam thung jam ha ka jingleit pule laiñ jongki samla pule ruh.
Ka ïing Bishar kaba kynthup ïa ka Chief Justice Revati Mohite Dere bad u Justice W Diengdoh ki la mynjur halor kane ka jingpan por ka sorkar lyngba u nongïasaid aiñ jongka u Advocate General A Kumar ban ai ia ka jubab hakhmat ka ïing bishar ha ka jingshong bishar biang ïa kane ka mukotduma ha ka 5 tarik Jylliew 2026.
Kat kum ka mukotduma PIL jong u bah Adelbert ula pynpaw ka jingpyrshah halor ka jingpyntreikam ka sorkar da ka polisi thungkam thung jam ne ka Job Reservation Polisi wat ha kaba leit pule laiñ ki samla pule ha ka bhah jongka sorkar pdeng ne ka Central Pool Quota ruh kum ka jingleit pule MBBS, Engineering, Agriculture bad kiwei kiwei ki laiñ da kaba pynpaw ba kam don satia da kawei pat ka polisi na ka bynta ka bhah leit pule bad kumta kane ka jingpyntreikam khlem ka aiñ ka long kaba pyrshah ïa ka riti synshar ka ri.
U nongujor ula pynpaw ba ka sorkar ka la ai jingpynbna ïa ki samla pule ba kin thep aplikeshon ha ka bhah pule jongka sorkar jylla katba la pyntreikam pat da ka polisi thungkam thung jam ban ai seat ïa ki samla pule Khasi-Jaintia, Garo, General bad kiwei kiwei ki jaidbynriew rit paid. La pynpaw ba kam don da kawei ka polisi ha kaba ïadei bad ka bhah pule laiñ jongki samla pule.
Kumta une u MLA ula ong ba ïa kane ka mukotduma la ujor ban peit ïa kine ki jingduna ha kaba ïadei bad ka jingjied ïa ki samla pule ban leit pule ha ka Central Pool Quota. La khmih lynti ruh ba ka ïing bishar kan ai ka jingbishar kaba biang halor kane ka jingujor.