Bym don passport kibahaïing, pan jingïarap u MLA na u Myntri Rangbah ban ioh pynpoi ïa ka met shala ïing
Khlad ka nonghikai ka tem ka put ba na ri lum Garo ha Dubai
Tura, Jymmang 24: Ka met basah jong ka Kresitha Gabil Momin, 41 snem ka rta, kaba la khlad noh ha Dubai, ha ka 21tarik Jymmang, ka la poi sha Delhi mynta ka step lyngba ka liengsuin jong ka Air Arabia.
Ka Kresitha ka dei kaba wan na Rongjeng ha East Garo Hills district jong ka Jylla Meghalaya bad ka Kresitha ka dang trei kum ka nonghikai Violin ha ka Arab Unity School LLC kaba don ha Dubai.
Ka Kresitha kala kem pang ha ka 15 tarik u Jymmang bad ka la shah sumar ha Mirdif Private Hospital ha Dubai.Ka la khlad noh ha ka 21 tarik u jymmang namar ka jingpang hyperkalemia, bad metabolic acidosis.
U MLA ka Rongjeng, u Jim Sangma, u la ïathuh ba ka longïing kaba sngewsih ka la leit sha u ban pan jingïarap, namar ba ym don uwei ruh u dkhot jong ka longïing uba don ïa ka passport ban leit sha Dubai ban pyndep ïa ki kam ban wanphai biang sha la ka jong ka ri.Nangta u MLA u la leit ban ïakynduh ïa u Myntri Rangbah ka Jylla u Conrad K. Sangma ban pan jingïarap na ki bor ba kham khraw.
U Myntri Rangbah ka Jylla u la bthah mardor ïa u Chief Secretary Dr. Shakil P. Ahammed bad ïa ki nongtrei jong ka Chief Minister’s Office (CMO) ban ïakren bad ka longïing bad ban pynthikna ba ïa ka met basah yn wanrah biang sha ka jaka ba la kha ïa ka.
U MLA u Jim Sangma u la pynpaw ka jingsngewnguh kaba khraw ïa u Myntri Rangbah ka Jylla, ïa u Chief Secretary ka Jylla, bad ki nongtrei jong ka CMO kiba la ïatreilang bad pynsuk.U la pynpaw ruh ïa ka jingïaroh ïa ka Indian Embassy ha Dubai kaba la ai ka jingïarap kaba donkam, kumjuh ruh ïa u Issac Sadap, u nongshong shnong ka Jylla Meghalaya uba trei ha Dubai, ïa uba la ai bor da ka longïing ban shimkhia ïa ka met basah.
La pynlong ïa ka jingduwai kaba lyngkot ha kad liengsuin na ka bynta ka mynsiem kaba la khlad noh.
Hadien ka jingleh niam, ïa ka met basah yn pynkit da ka liengsuin na Delhi sha Guwahati, ha kaba ka longiing kin pdiang ïa ka bad kit sha Rongjeng na ka bynta ka jingleh niam kaba khatduh.