Lahduh ka Rangthong CC&SA ha ka Women’s FT bad ka The Shield FC ha ka Under-13 Boys FT 2026

Mawkyrwat, Jymmang 25: Ka Pynnoh Riwar Sports Academy ka la lah ban pynkut jop ïa ka jingïalehkai kynjatbol kaba la tip kum ka Women’s Football League 2026 bad Under-13 Boys Football League 2026 ba la pynlong ha madan Mawendeng, Nongnah, South West Khasi Hills District. Ha kane ka sngi la sakhi da ka jingïadonlang ki kongsan, ki nongïalehkai, ki ophisar bad ki paidbah ieid phutbol na kylleng ka thaiñ.
Ha ka jingïakhun phainal jong ka Women’s Football League 2026, ka Rangthong CC&SA ka la rah ïa ka nam jop hadien ba ka la pynliem ïa ka NNS&CC da 1 – 0 kol ha ka jingïalehkai kaba itynnad bha. Ïa ka kol ban pynjop ïa ka kynhun la thep da ka Wanrahjingkmen Khardewsaw.
Ha kane ka sngi la sam ruh ïa ki khusnam shimet ha ka Women’s Football League 2026 ki long: Most Promising Player ka Rosimerry Sohlang (Photjaud Rangthong SC), ka nongapkol ba tbit dei ka Gracefully Lyngkhoi (Nongktieh United SC), ka nongthep bun kol dei ka Wanrahjingkmen Khardewsaw (Rangthong CC&SA) kaba la thep 6 kol, ka ‘thei ïalehkai ba tbit dei ka Eightfulness Shangdiar (Rangthong CC&SA), bad ka kynhun kaba biang tam ha ki liang baroh dei ka Domsohkhai S&CC.
Ha ka jingïakhun phainal jong ka Under – 13 Boys Football League 2026 pat, ka The Shield FC ka la pynliem ïa ka Thangrai Sports Club da 3 – 1 kol ban rah ïa ka khusnam lahduh. U Khrawpyrkhat Syiemlieh ula ïalehkai bha da kaba thep ar kol, katba ïa ka kol kaba lai la thep da u Vinkykupar Nongrum.
Nangta, ki khusnam shimet ha ka Under-13 Boys Football League 2026 ki long: Most Promising Player dei u Raydonald Iawphniaw (The Shield FC), nongapkol ba tbit dei u Manbhakupar Shangdiar (Rangthong CC&SA), u nongthep bun kol dei u Jonathan Turnia (Thangrai Sports Club) uba la thep 6 kol, u ‘rangïalehkai ba tbit dei u Khrawpyrkhat Syiemlieh (The Shield FC), bad ka kynhun kaba biang tam ha ki liang baroh dei ka Myriaw Sports Club.
Ha kane ka jingïalang pynhap pyrda, ka Pynnoh Riwar Sports Academy ka la ai jingkhublei kyrpang ruh ïa saw ngut ki dkhot jong ka Academy kiba la pass bha ïa ka All India Football Federation (AIFF) ‘D’ License Coaching Course, kaba long ka jingïaid shaphrang kaba khraw bad ka jingsarong ïa ka Academy.
Kine ki saw ngut ki long u Teiborlang Ryntathiang, u Kduplang Nongrem, u Banteiskhem Iawphniaw bad u Ibanpyntngen Thongni.
U Forward M. Nongrem, Managing Director jong ka Pynnoh Riwar Sports Academy, kum ka dak ka jingithuh ïa ka jingaiti lut, jingtrei shitom bad jingangnud jong ki ban kyntiew ïa ka kam hikai phutbol bad ka grassroots development hapoh ka thaiñ u la pynpaw ruh ïa ka jingaikhublei ïa baroh ki kynhun jingïalehkai, ki nongïalehkai, ki coach, ki ophisar, ki nongkyrshan bad ki volunteer kiba la noh synñiang ha ka jingïaid beit ïaid ryntih bad ka jingjop jong kine ki ar tylli ki lympung ïalehkai, kumjuh ruh ban kyntiew ïa mynsiem jingïalehkai phutbol hapoh ka thaiñ.
Ïa kane ka prokram la pynphuh pynphieng da ka jingïadonlang u Bahun S. Basan kum u Kongsan, ha ryngkat ka jingïasynranlang u bah H.S. Diengdoh, MCS ba la shongthait bad President jong ka South West Khasi Hills District Sports Association, u Remdor Lyngkhoi, General Secretary jong ka Ranikor Civil Sub-Division Sports Association, u Narayan Thongni, General Secretary jong ka Southern Border Area Sports Association, ki nongmihkhmat jong ka Kur Lyngkhoi, ki nongmihkhmat na ki sports club bapher bapher bad kiwei pat ki riew rangbah.