SHILLONG, Jymmang 25: U Myntri ka tnad Sports ka Sorkar jylla Meghalaya, u bah Wailadmiki Shylla u la shah jied kum u President ka Meghalaya Basketball Association na ka bynta ka samoi treikam jong u snem 2026-30.
Ha kane ka elekshon jied nongkitkam la ïashim bynta lang da ki nongmihkhmat jong ki synjuk District ba ladep ïasoh bad ki dkhot kiba don ka hok, kaba pyni ïa ka jingshimkhia ban pynkhlaiñ ïa ka jingpynïaid bad jingpynroi ïa ka Basketball ha ka Jylla Meghalaya.
Ban pynthikna ïa ka jingjied nongkitkam kaba beit bad kaba ryntih la pynïaid ïa kane ka elekshon hapoh ka jingpeit jong u Returning Officer uba la shah thung bad ha ka jingïadon lang u Observer ba la phah da ka Basketball Federation of India, ryngkat na ka tnad Sports jong ka Sorkar Meghalaya bad ka Meghalaya State Olympic Association
Nalor u Wailadmiki Shylla kum u President, ka synjuk ka la jied ruh ïa u Carnes Sohshang bad Henry S Marak kum ki Working President, ha ryngkat u bah James M Bamon kum u General Secretary, ban ïakit ïabah lem ïa ka kam.
Kane ka kynhun ki nongkitkam ba la jied thymmai ka la pynpaw biang ïa ka jingkular jong ka ban kyntiew bad pynroi ïa ka Basketball ha kylleng ka Meghalaya lyngba ki prokram bapher bapher, kynthup ïa ki jingthmu ban pynroi ïa ki nongïalehkai, ka prokram ai jinghikai, ka jingpynbha ïa ki jingtei, bad ka jingïashim bynta kaba kham bun ha ki lympung ïalehkai ha ka thaiñ bad ha ka ri baroh kawei.
Ka Association ka khmih lynti ruh ban ïatreilang bad ka Basketball Federation of India, ka Sorkar Meghalaya, ki Association jong ki district, ki jaka pule, ki Club, bad baroh ki nongshim bynta na ka bynta ka jingroi kaba bteng jong ka Basketball ha ka jylla.
Ka Meghalaya Basketball Association ka pynpaw ïa ka jingsngewnguh ïa baroh ki synjuk, ki nongmihkhmat, ki ophisar, bad ki nongshim bynta halor ka jingïatreilang bad jingkyrshan jong ki ban pynthikna ïa kane ka elekshon ba kan ïaid beit ïaid ryntih.
Kine ki long ki kyrteng jong ki nongkitkam ka MBA ba la jied thymmai:
President – Wailadmiki Shylla MLA
Working Presidents – Carnes Sohshang, Henry S Marak
Vice-Presidents – Joel Marbaniang, Wanlambok Iawphniaw, James R Lyngwa, Naphishisha Marwein
General Secretary – James M Bamon
Joint Secretaries – Banskhemalang Wahlang, Jessica T Sangma
Treasurer – Andy L Basaiawmoit
Executive Members – Teilang Pde, Johnny Lee Lamare, Ashaliya Wahlang, Judah Wayne G Momin, Abhyan Changgu G Momin
