Shisien bym ithuh shuh ïa kyrteng ki jingthung ka jingtip ïa ka tynrai ki dawai kynbat ruh ka la duh : BDO

By Mawphor Editor On May 25, 2026

Shillong, Jymmang 24 : U Block Development Officer (BDO) ka Baghmara & Siju Block, u Chengreng D Sangma u la ong ba ka jingpyrshang khih ka pyrthei ban pynneh pynsah ïa ka mariang kan long leh nohei lada kam don ka jingmlien ban leh ïa ka na la ki iing ki sem.
Ïa kane u la kren ha ka jingïalang rakhe ïa ka International Day for Biological Diversity (IDB) ha Karukol community, South Garo Hills da ka jingïatrei lang hapdeng ka North East Society For Agroecology Support (NESFAS), bad ka Meghalaya Biodiversity Board (MBB).
Ka thong jong kane ka prokram ka long pynrung ïa ka thong, ‘Acting Locally for Global Impact.’ Ha kane ka lympung la wan ban shim bynta naduh ki riew paidbah, ki nongïalam na ka sorkar, ki heh na ka tnad Forest, ki nongïalam shnong bad ki samla kiba la ïatai sani kumno ba donkam kyrkieh ban pynneh pynsah ïa ka mei mariang.
“Ka jingduh noh ïa ki jingthaw ba im kam dei eh kaba ktah na ka jingnang duh arsut ki sawdong sawkun hynrei ka dei ruh ka jingduh wat ïa ka jingtip tynrai ha ki ktien shnong,” u la ong.
Katkum ka jingong jong u shisien ba ki paidbah ki la klet noh ïa ka kyrteng jong kino kino ki jingthung ha ka ktien shnong jong ki, kata hi ka kdew ba ka jingtip tynrai ka la duh noh khamtam haba ïadei bad ki jingthung ba pyndonkam kum ki kynbat dawai. U ong ba kane ka ktah lut wat ïa ka khana pateng bad ka tynrai ba ki don.
Halor kane, u kyntu ïa ki samla pule ba ki dei ban pynneh pynsah ïa ka jingtip tynrai ba ki tip ha ki ktien shnong jong ki khamtam haba ïadei bad ka kyrteng ki syntiew ba don ha ka thain.
Ha kane ka sngi la ïoh ruh ïa ka jingkren na u Eliazer Ch. Momin, Baghmara Range Officer, uba la ong ba ka jingpynneh pynsah ïa ki khlaw ka long thik kumba sumar ïa ki hati bad ki mrad ba im namar kine ki donkam ïa ka jingdon ki khlaw ki btap.
La ïoh ruh ïa ka jingkren na u Bethuel G. Momin, Nokma jong ka Rongchekgre, nangta na u Betroy M. Sangma, Principal ka Karukol Higher Secondary School bad kiwei kiwei.