Shillong, Nailur 22 : Ka Sorkar Jylla ka la don jingthmu ban wanrah jingkylla noh ha ki kyndon treikam jong ka skhim Special Rural Works Programme (SRWP) khnang ba ki MLA kin lah ban buh ïa katto katne ka song pisa ha ka ban ai jingïarap kyrkieh ïa ki lanot kiba mad ïa ka jinglynshop ki bor mariang.
ïa kane la pyntip da u Myntri Rangbah ka Jylla Conrad K Sangma ha ka kynta kylli jingkylli hapoh ka Dorbar Synrai ka ïing Dorbar Thaw Aiñ ka Jylla, kaba kut mynta ka Sngi Thohdieng.
Kane ka jingkren u Myntri Rangbah ka la mih haba bynrap ïa ka jubab jong u Myntri ka Tnad Revenue and Disaster Management Bah Kyrmen Shylla halor ka jingkylli ba la wanrah da u MLA ka Mawryngkneng Bah Heavingstone Kharpran halor ka song jingïarap sha ki artylli ki Longïing kiba shah ktah ha ka jingpluh ïing.
U MLA ka Umsning Dr Celestine Lyngdoh ula ai jingmut ban buh noh da ka contingency fund ban ïarap ïa ki longïing kiba shah ktah ha ka jingwan lynshop ki bor ka mariang.
U Myntri Rangbah ula pyntip ba ha ka jingïalang ba dang shen jong ka MDA, katto katne ki MLA ki la ai ïa kane ka juh ka jingai jingmut.
“Watla ngim pat lah ban thaw ïa ka contingency fund ïa mynta namar kan sa ktah ïa ka pla tyngka hynrei kaei kaba ngi la pynkhreh ka long ban shu pynkylla ïa ki kyndon jong ka SRWP khnang ba kan kham jynsur haba pyndonkam ïa ka song pisa ha ka por ba donkam” ula ong.
Shuwa kane, u Bah Kyrmen ula pyntip ba ka Tnad kala dep ban ai ïa ka song pisa sha ki artylli ki Longïing jong u Bah Banteiskhem Kharumnuid bad ka Kong Rina Marboh.
“Baroh arngut kila ïoh ïa ka song pisa ba mar T. 1.35 lak lyngba ka Public Financial Management System (PMS)” ula ong.
