Shillong, Nailur, 22: U Symbud Myntri Rangbah ka Jylla uba peit ïa ka tnat Pynroi Sor u Bah Sniawbhalang Dhar u la ong ba ka daw ba ka Ministry of Housing and Urban Affairs (MoHUA) ka la ñiew ïa ka Shillong kum kawei napdeng ki 10 tylli ki nongbah bym lah ban pyntreikam pura ïa ki Smart City projek dei na ka daw ba ka Shillong Smart City Ltd (SSCL) ka la shah jied kum ka 100th Smart City, ka Smart City ba khatduh eh ba la jied ha u Jylliew, 2018.
“Kiwei ki 99 tylli ki Smart Cities ki la shah jied hapdeng u snem 2016 bad Kyllalyngkot, 2018. Hynrei, kam long kaba dei ban ïanujor ïa ka Shillong bad kiwei kiwei ki nongbah namarba kiwei kiwei ki ladep pynsdang ïa ka kam kham hashwa,” ong u Bah Dhar haba jubab ïa ka jingkylli ba la wanrah ha ka Ingdorbar Thawaiñ ha ka sngi Thohdieng.
U la ong ba sa kawei pat ka daw ka dei na ka daw ka jingkylliang ba manla ka por da ka Ministry of Housing and Urban Affairs (MoHUA) ïa ka rukom ai kyrdan.
Shuh shuh la pynpaw ba ka Shillong Smart City Ltd ka la don ha ka kyrdan kaba 69 ha u snem 2022 bad ka la hiar ha ka jingïoh kyrdan ha u snem 2023 na ka daw ka jingkylliang ïa ka rukom ai kyrdan da ka MoHUA ha u snem 2023, u la bynrap.
U Symbud Myntri Rangbah u la ong ba ka projek ba la mang ka long baroh T. 211.87 klur. Na kane, T. 154.21 klur ka dei ka ram ba la shim na ka Housing and Urban Development Corporation Ltd (HUDCO), Ministry of Housing and Urban Affairs, New Delhi.
Ïa kane ka projek la shim kum ka Engineering, Procurement and Construction (EPC) Tender. Hynrei, ym shym la donkam ban wanrah ïa ka jingdro ha ka por ba la leh ïa kane ka projek u la ong.
