Don 124 ngut ki Consultant, la siew 22.56 klur tyngka :CM

Shillong, Nailur 22: U Myntri Rangbah u Conrad Sangma u la iathuh ba ki don 124 ngut ki Consultant ba la thung da ka sorkar jylla na ka bynta ki Projek bapher bapher ha Jylla.
Na kine ki 124 ngut, 59 ngut kidei na ka bynta ka ki externally aided Project ne ki kam pynroi ne ki Projek kiba la kyrshan pisa na shabar ri. Katba kiwei pat 65 ngut pat kidei na ka bynta ki Projek kiba pyntreikam da ka sorkar jylla. U Conrad u la ïathuh ruh ba na ki 124 ngut, 98 ngut kidei kiba na shabar jylla bad 24 ngut pat kidei kiba napoh ka jylla.
Ka jingsiew kaba la siew ha une u snem mang tyngka ka long 22.56 Klur tyngka.
Kane ka jubab jong u Myntri Rangbah ka jylla ka long halor ka jingkylli ba la wanrah da ka MLA jong ka Seng Trinamool Congress ka Miani D. Shira.
Ka MLA jong ka Ampati ka la kylli ruh halor ki kam ba kine ki Consultant ki trei, la ka long kaba dei beit ban thung ïa ki ne ka don ne em ha ki kyndon jong ki Projek ba ïoh jingïarap na shabar ba hap thung beit ïa ki Consultant.
U Myntri Rangbah ula ong ba ki kyndon ki kren ïa kata, hynrei kaba kham donkam eh ka long ka jingaibuit bad ka jingïalam lynti ki Consultant ha kaba pyntreikam ïa ki Projek bapher ka la ïarap shibun ban lad ban pyndep ha ka por ba biang bad khamtam ha kaba leh bad pyntrei katkum ki kyndon.
Na ka liang u Bah Ardent Basaïawmoit u la buh ka jingkylli, hato ka sorkar ka da buh da ka dor katno ka jingsiew kaba bun tam bad ka jingsiew kaba rit tam. U Conrad u la ïathuh ba ka jingsiew ka long katkum ka jingheh ka tender bad ka jingsiew ruh la buh lypa ha ka jingpyntrei kaba long da ka percentage.