Nongstoiñ, Nailur, 22: Ka Seng Khasi Student Union Nongstoiñ Circle hapoh ka jingïalam u Samla Robertgil Kharsewsaw Education Secretary, ka la leit ïakynduh ïa ki bor pynïaid skul ka skul Sib Sing Memorial Government Higher Secondary School, ban tuklar halor ka jingbym don ïa u nonghikai Mathematic u ba pura ha kane ka skul na ka bynta ki khynnah pule ha ka klas IX bad X.
Na ka liang jong ka Seng ka la dawa na ka Sorkar bad kumjuh ïa u Director jong ka tnad pule puthi, ba kin thung noh pura da uwei u nonghikai, khnang ba kan ym long ka jingduhnong ïa ki khynnah skul kiba pule ha katei ka skul.
Shuh shuh ka Seng ka la pynpaw ruh da kaba ong bat katkum ka jingïoh jingtip ka Seng ïa ka post DSEO, SDSEO bad Joint Director, la phah incharge ha ka Principal jong katei ka skul, kaba la wanrah ka jingdkoh pat ïa ka jingtreikam jong ka. La ong ruh ba ban thung briew pura ha kine ki post, ka sorkar ka la ai daw ba ym don briew ban shimti bad ïa kane ka Seng kam lah satia ban pdiang.
