Shillong, Nailur, 22: Haduh mynta ki don 32 ngut ki nongaplai kiba la phah ïa ki aplikeshon katkum ka SOP ba la pynmih da ka Sorkar naduh ka 5 tarik, Lber, 2021 na ka bynta ban ai ïa ki laisen ban tih dewïong.
Na kine, 17 ngut ki nongaplai ki la ïoh ïa ka jingmynjur na ka Sorkar Pdeng bad mynta ki dang ap ban phah ïa ka Geological Report shwa ban ïoh ïa ka Mining Lease, la ong u Myntri Rangbah ka Jylla u Conrad K. Sangma haba jubab ïa ka jingkylli ba la wanrah hapoh ka Dorbar Synrai jong ka Iingdorbar Thawaiñ ka Jylla ha ka sngi Thohdieng.
Shuh shuh, saw ngut na ki 17 ngut ki nongaplai ba la ïoh jingmynjur hadien ba ki la phah ïa ka Geological Report ki la ïoh ïa ka jingmynjur na ka Sorkar Pdeng ban ïoh ïa ka Mining Lease hapoh ka Jylla bad ka jingpyni ïa ka Mining Plan ka ladep bad dang ap sa ïa ka jingmynjur ka Mining Plan, u la ong bad ïathuh ba ki 15 ngut ki nongaplai ki dang ap ban ïoh ïa ka jingmynjur na ka Sorkar Pdeng na ka bynta ka laisen.
