Shillong, Nailur, 22: Ka Sorkar ka la hap ban pynsangeh shwa shipor ïa ka jingai Permit ïa ki Taxi kamai ha nongbah shillong na ka bynta ban bishar bniah bad ban pynbeit ryntih, la ong u Symbud Myntri Rangbah ka Jylla uba peit ïa ka tnat Transport u Bah Sniawbhalang Dhar ha Ingdorbar Thawaiñ ka Jylla ha ka sngi Thohdieng.
Haba jubab ïa ka jingkylli ba la wanrah da u MLA ka VPP na North Shillong u Bah Adelbert Nongrum, u Bah Dhar u la ïathuh ba ka daw ka long ba ki Bos STPS ki bym shym la pyndonkam shuh la shu set ha ki bynta bapher bapher jong ka nongbah Shillong namarba ïa kine ki kali ym long shuh wat tang ban pyndonkam.
Halor ka jingkylli, hato ka Sorkar kan wanrah neem da ka polisi ban pyrkhing ïa kino kino ki Tourist Taxi kiba wan nabar jong ka jylla ban rung sha nongbah Shillong khnang ban pynduna ïa ka jingdheng kali, u Myntri u la ong ba kan ym don kano kano ka jingkhanglad namarba katkum ka Permit la shah ba kin kamai ha baroh kawei ka ri India. Hynrei, ka Shillong ka long ka khyrdop rung bad mih sha kiwei pat ki bynta jong ka jylla.
Ïa ki Tourist Taxi yn ym lah ban khanglad hapoh ka Para 4 katkum ki kyndon jong ka All India Tourist Vehicle Permit, u la bynrap.
