Shillong, Nailur, 22: Ka jingtei ïa ka Ïing u Lat ha Tura, West Garo Hills ka lah ban dep noh ha u Lber jong u snem ban wan.
Katkum ka jubab ba la wanrah ha Ïing Dorbar Thawaiñ ka jylla ha ka sngi Balang, u Myntri ka tnad GAD, Rakkam A Sangma u la ong ba ka por ban pyndep noh ïa ka kam ba dang sah ka long 12 bnai na ka tarik ba ai ïa ka work order kaba khatduh kata ha u Lber 2024.
La ong ruh ba ka por ban pyndep ïa ki kam ba mih tam ki long 12 bnai na ka tarik ba ai work order khatduh, kata hapoh u Kyllalyngkot 2024.
Ïa ka jingmynjur ban tei ïa ka Ïing u Lat kadei ha ka 07tarik Nailur 2009 bad ïa u mawnongrim pat la buh ha ka 06tarik Nailar, 2010.
Ka jingmynjur na ka bynta ban pyndep ïa ki kam ba dang sah kadei ha ka 2tarik Nohprah, 2020 bad ka jingmynjur na bynta ki kam kiba mih tam pat kadei ha ka 27tarik Risaw, 2022. La kdew ruh ba ïa ka orginal tender la pynbna ha ka 14tarik Naiwieng, 2009 bad ka tender na bynta ki kam ba dang sah ha u Nohprah 2020 katba na ka bynta ki kam kiba mih shuh la pynmih ïa ka tender ha ka 28tarik Risaw, 2022.
U Myntri u la ong ruh ba ka dor trai ba mang na bynta katei ka long, 5,47,89,000 tyngka. Ka jingmang na bynta ki kam ba dang sah ka long, 10,97,87,971 bad ka jingmagn na bynta ki kam ba mih tang ka long 7,68,81,960. Kumta lada khein lang baroh ka poi sha ka 24,14,58,931 tyngka u la ong.
