Na ka kyrdan ba shadien- ka Mawkynrew Block ka la wan shakhmat: Banteidor
Shillong, Nailur 22: Ka Mawkynrew Community and Rural Development (C&RD) Block na ka jingshah kheiñ ba ka dei ka ba sahdien ha ki snem kiba la dep hynrei mynta pat lyngba ka jingïatreilang da ki bor pynïaid bad nongshong shnong na ki shnong bapher bapher ha kane ka Block bad ki ophisar lem u nongmihkhmat hi ka la pynlong ïa ka ban wan sha ki kyrdan ba kham sha khmat ban ïa kiwei pat ki Block ha ka Jylla hi baroh kawei haba khein na ka jingkiew ka roi ka par ha kiba bun ki liang.
Ïa kane la pynpaw da u MLA ka thain, u Bah Banteidor Lyngdoh haba kren ha ka jingïalang kaba la pynlong ha ophis BDO Mawkynrew C& RD Block ha ka 20 tarik u Nailur, 2023 ban aiti ïa ki Work Order sha ki longïing ba duk ba kin ïoh shna iing shong iing sah lyngba ka Pradhan Mantri Awaas Yojana (PMAY) kiba don baroh kumba 1800 longïing ha kane Block.
Ym tang katta, ha ka sngi u MLA u la aiti ruh ïa ki tin sop iing sha 200 tylli ki longïing nalor ki jingïarap lyngba ki tiar ki tar, ki symbai bad kiwei kiwei pat ban kyntiew ïa ki nongrep soh strawberry ha ka thaiñ. “Ngi la ïohi ba ka Mawkynrew C&RD Block ka la wan ha ka kyrdan ba san na kiwei pat ki Block ha ka Jylla kiba la shim jingithuh kum kiba lah bha ban pyntyllun ïa ki kam ki jam”, u la ong.
U la ong ruh ba kum u nongmihkhmat naduh ba u long MDC haduh ban long kum u MLA hi um kwah ban leh buhrieh ïa ki skhim kiba dei hok jong u paidbah. “Kumba paw la don kiba wad RTI na ophis Block hynrei kim shym la ïoh daw eiei ïa nga”, la ong u Bah Banteidor uba la pynpaw ba ka jingangnud jong u hi ka long ban shakri ban kyntiew ïa ka Mawkynrew Constituency bad ban wan ha ki kyrdan ba ha khmat eh.
Halor ki jingmyntoi sha ki paidbah kiba la sam ha katei ka sngi, u Bah Banteidor u la ong ba kiba ïoh jingmyntoi kin pyntreikam hok ïa ki. “Hooid kin don ki Committee ban shna iing na ka bynta ki bym lah bor ban shna hi hynrei dei ban don bha ka jingïasngewthuh jingmut”, la ong u Bah Banteidor ïa kiba la ïoh pdiang ïa ki Work Order PMAY.
Halor kiwei pat ki bym pat ïoh jingïarap da ki tin ne ha ki bynta kam rep soh strawberry, u la ong ba kin long ïashah namar ki jingïarap kin dang ïai bteng na ka bynta ki nongshong shnong bad ym dei ba tang shu pan la ïoh noh. “Ngi hap ban ïa long kiba ïai shah namar ki don ki longïing kiba donkam kyrkieh ban ïarap ïa ki bad kumta la ai shwa sha ki”, la ong u Bah Banteidor.
Ha kane ka sngi, la ïa donlang da u BDO ka Mawkynrew C&RD Block, u Bah G Dhar, ki ophisar na ka tnad Agriculture bad Horticulture, ki nongïalam shnong bad kiwei pat. Ki samla ha kane ka sngi ki la ai ka jingrwai kaba nujor ïa ka long ka man kane ka Constituency ha ki por ba la dep bad kaba mynta.