Nongpoh, Nailur 22: Watla kiba bun ki khun ki hajar hapoh ka Raid Ïapngar ki la sdang ban klet ïa kawei kolshor ba la leh da u mynbarim namar jingkylla stet jong ki shalyntem ka por, hynrei ban pynneh pynsah ïa kawei ka kolshor jong ka Raid Ïapngar, ka Kong Telis Rymbai kum kawei na ka Longkmie ba paw hapoh ka Raid ka la mih shakhmat ban pynim ïa kane ka kolshor kaba la tip paidbah kum ka ‘Buh Lung Rynshong’.
Ka Kong Telis Rymbai ka dei kaba shong ba sah ha ka shnong Kdonghulu kaba hap hapoh ka Raid Ïapngar, Hima Khyriem bad ka dei ruh ka nonghikai ba la shongthait bad kaba la pynlut por ruh kum ka Nongthoh Kot hadien ba la shongthait na ka kam hikai skul.
Haba kren halor kane ka jingpynneh ïa ka riti ka dustur buh Lung Rynshong, ka Kong Telis Rymbai ka la ong ba kum ka longkmie kaba la noh ka rta ka dang kwah ban pynneh pynsah ïa kane ka kolshor, namar katkum ka jingïaid kane ka juk bun ki khun ki hajar ka Raid ki la klet noh ïa kane ka kam kaba dei kawei na ka jinglehkmen ki khun ki hajar hapoh ka Raid bad ha ka sngi ba la buh lung rynshong ka don ka jingïabam khawai naduh ki khyllung ki khynnah bad ki longkmie, ki longkpa jong ka shnong kaba ki ju ïa lehkmen lang.
Ka la ïathuh ruh ha ki por mynshuwa ka don ka nongkylliang ba ki ïa trei lang ban buh ïa kane ka Lung Rynshong ba ki riew rangbah ki leit sha khlaw ban pom ïa ka Lung siej bad ki Longkmie pat ki ïa khoh ïa ka lung ban buh ïa kane ka lung rynshong.
Ka la ong ruh ha ki por hyndai, ki ju pynïap ruh da u sñiang ban buh ïa kane ka Lung Rynshong ba baroh ki nongshong shnong ki ïabam sngewbha na u sñiang ba ki pynïap, hynrei ki bynta jong ka krung bad kiba long khleiñ ki thep ha ka Khara ba buh ïa ka lung rynshong khnang ba kan bang bha kata ka lung rynshong.
“Ki longkmie ki ïa bun kam ha kaba khoh ïa ka lung bad ot rit ïa ka lung ban pynlwet da kaba dung ha u thlong. Hynrei mynta ba ym don shuh kita ki thlong, ki synrei la pyndonkam noh da ka klat steel bad ki sa buh ha ka khara ba kan long kum kata ka lung rynshong bad uwei na u jingber ba sma iwbih u dei u Pongmurit uba ki ju shet ïa kane ka Lung Rynshong haba la shet ïa ki kynja dohum kum ki dohthli, ki dohshalanai bad kiwei kiwei ki kynja dohum,” la ong ka Kong Telis Rymbai.
Ka la ïathuh ba ka don ka jingangnud ban pynneh pynsah ïa kane ka riti ka dustur hapoh ka Raid bad dei namar kane ka daw ka la shimkhia biang ban pynkhie im ïa kane ka kam buh lung rynshong kaba long ruh kum ka jinghikai sha kiwei ba kim dei ban klet ïa la ka jong ka tynrai namarba kane ka jingbuh lung rynshong ruh ka dei kawei na ka jinglehkmen ki khun ki hajar hapoh ka Raid.
