Mawkyrwat, Lber, 12: Lai tylli ki Unit jong ka Khasi Students Union (KSU) ba kynthup ia ka KSU South West Khasi Hills District, ka KSU Mawkyrwat Circle bad ka KSU Mawkyllut Unit ha ka sngi saitjaiñ jong ka taïew ba ladep ki la pynkupburom ïa u Ferdinand Lyngdoh Marshillong uwei na ki samla rangbah u ban sa leit ïashim bynta ha ka International Visitor Leadership Program (IVLP) ka ban sdang naduh 20 tarik, Lber, haduh ka 7 tarik u Ïaïong, 2023 hapoh Ri America.
Ha ka jingïalang kaba la long ha ophis treikam jong ka KSU ha Mawkyrwat, ki nongïalam ka seng ki la ai ‘a ki kyntien kyrkhu kyrdoh ïa u Ferdinand watla u don ka jingduna ha ka dkhotmet ha ki bynta jong ka bor ïoh sngew hynrei khlem kynran dien ban leh ïa kiei kiei ki kam kiba bha ha ka imlang ka sahlang bad kham kyrpang ba ha kane ka kynti ba mynta ha kaba un sa leit ban mihkhmat hapoh Ri America ha ka International Visitor Leadership Program (IVLP) bad kane ka la long shisha ka jingsarong na ka bynta thaiñ, ka ri bad ka jaidbynriew namar ki para-doh para-snam ki ïoh ban ïa pynpaw ïa kiei kiba ki don ha kiwei pat ki ri.
U Bah Ferdinand u bat mynta kum u Chairman Federation of Persons with Disabilities, ka kynhun synroplang jong ki seng ba pynïaid da ki briew kiba don ka jingduna ha ki dkhot met ha Meghalaya ha ka jingkren jong u u la pynpaw ka jingaikhublei na ka bynta ka KSU kaba la kynmaw kyrpang na ka bynta jong u ryngkat ki kyntien ai mynsiem shwa ba un leit hapoh Ri America. “Ka jingaimynsiem jong phi ka la long ka jingkhlaiñ na ka bynta jong nga bad ngan lah ban pyndep ïa la ka jong ka kamram”, ong u bah Ferdinand Lyngdoh.
Shuh shuh u la ong ruh ba ka jingïoh lad jong u ban leit ha kane ka International Visitor Leadership Program (IVLP) hapoh Ri America ka dei lyngba ka jingïohi ïa kiba bun ki kam jong ka jingtrei shitom bad kumjuh ruh lyngba ka jingïarap lem jong kiwei de bad kumjuh ruh ka jingleit jong u hapoh America kam dei tang ba un ïoh jingmyntoi shimet hynrei u don ruh ka jingthmu ban wanrah ki lad pyrkhat thymmai ha la ka jong ka ri bad ka jylla Meghalaya baroh kawei.
