Mawkyrwat, Lber, 12: U Bah Renikton Lyngdoh Tongkhar uba long u MLA jong ka Mawkyrwat Constituency ha ka Sngi Saitjaiñ u la noh synñiang da ka song pisa sha ki san ngut ki briew kiba dei ki trai dukan kiba la shah bam duh ha ka ding ha ka shiteng miet jong ka 9 tarik u Lber, 2023 ha ïew Shnong Dombah, Sakwang, South West Khasi Hills District.
Lah ban pynkynmaw ba ki 5 tylli ki dukan kiba la shah ktah bad shah pynjulor ki long ar tylli ki dukan marbam kata jong ka Bonlina Kharjahrin bad jong ka Drip Wartde, ar tylli ki dukan sha kata jong ka kong Biak Wartde bad ka kong Di-ioris Ramsiej, bad kawei ka dukan die taiñ kaba dei jong ka kong Ridalin Lyngkhoi.
Ha kane ka sngi la ïoh ruh ka jingkren ai mynsiem na u bah Renikton Lyngdoh Tongkhar u Nongmihkhmat jong ka Mawkyrwat Constituency ha kaba u la ong ba kane ka dei ka sngi ba nyngkong eh kum u nongmihkhmat u la ïoh ban leh ei ei na ka bynta ki paidbah hadien ba u la jop ïa kane ka MLA Election 2023 dang ha kine ki khyndiat sngi. “Watla phi la duh shibun bah ki tiar ki tar, ka spah ka phew ha ka jingshah bam duh noh ha ka ding hynrei ai nguh pat ïa U Blei ba ym shym la don kano kano ka jingjia ba sngewsih ne jingduh ki mynsiem briew”, ong u bah Renik.
Kumta, u la ong ba ka jingwan jong u mynta ka sngi ka long ban sngewlem ïa ki baroh 5 ngut ki trai dukan kiba la shah ktah na ka daw jong ka jinging ding noh ki dukan jong ki bad u don ruh ka bynta kum ka dak kaba rit eh ban ïarap bad ban long ruh ka jingkyrshan kaba rit eh ba kine ki 5 ngut kin ïoh ban sdang biang ban pyntyllun ïa ki kam lyngba ki dukan. “Ngam lah ban ïarap kham bun namar ki la don haduh 5 tylli ki dukan, hynrei tang khyndiat eh kum ka dak jong ka jingaimynsiem bad ma ki ruh da lade kin pyrshang ban wad ki lad ki lynti ba kin ïoh ban sdang bad pynïaid shaphrang ïa ka kam”, u la ong.
Ha kane ka sngi la ïadonlang naduh ki trai dukan kiba la shah ktah ha katei ka jingjia pluh ding ki dukan bad kiwei de ki ‘riew rangbah.
