Jowai K’Lyngkot 03: Ki nongshong shnong na kylleng ki dong (skur) hapoh ka nongbah Jowai kumba long shishien shisnem kila mih paidbah ban ïashim bynta lang ha ka ban pdiang sngewbha ïa u snem thymmai 2023 hynnin ka sngi lah sngi U Blei da kaba pynlong ïa ka jingïabam khana bad hadien kane kila pynlong sa ka jingïashad Carol kaba i shongkun bha.
Hynnin ka sngi la sakhi ïa ka jingshongshit jong kane ka sngi pdiang burom ïa u snem thymmai ha kaba da ki hajar ngut ki nongshong shnong kiba la mih shongshit nala ki jong ki dong kiba kynthup lang naduh ki hep rit, ki longkmie, ki longkpa bad ki khun samla shynrang bad kynthei.
Kine ki dong bapher bapaher hadien ka jingïabam khana kila mih ban ïashad da ka jingkmen ban ai khublei ïa u snem barim bad ban pdiang sngewbha ïa u snem thyme 2023 kiba la pynkhreh hala ki jong ki sur jingrwai ban leit kylleng sha ki dong bad ban leit pyni ïa ka rukom shad bad ka ki sur jingrwai ha Iawmusiang ha ka jaka bala pynkhreh da ka Jaiñtia Tourism and Environment Society (JTES).
Ïa kum kane ka shad kut snem ba la shim bynta da ki dong bapher bapaher la ju leh tang ha Nongbah Jowai, kiba la mih na manla ki jong ki dong ban leit ïuh kjat ha Iawmusiang bad nangne kila leit pait biang sha la ki dong, yn da la wan poi na kane ka jingïashad kila sdang sa ka prokram pynbyrnia ha ka por mynmiet lyngba ki sur jingtem Bad kiwei kiwei de.
