Jowai K’Lyngkot 03: U Lat jong ka Jylla u Brig. (Dr.) B. D. Mishra (Retd) hinnin ka sngi u la wan poi ha nongbah Jowai ban ïakynduh ïa ki khlieh jong ki tnat treikam bapher bapher ha ka jingïalang kaba la pynlong ha Conference Hall jong ka ophis Soil & Water Conservation Officer, Jowai.
Ha kane ka jingïakynduh na ka liang jong u Lat ula pynshlur ïa ki khlieh jong ki tnat sorkar bapher bapher ba kin pynthikna ba baroh ki skhim sorkar ki dei ban poi lut sha baroh kiba dei ban ïoh ïa ki bad ruh dei ban pyntreikam bha ïa kine ki skhim. Na ka liang ki bor District la ïoh ban ai jingkren da u P.K Boro, MCS uba la ai khublei ïa u Lat ka Jylla uba la ai ka jingkyrshan bad ka jingbatai bniah ba ïa ki skhim sorkar dei ban pyntrei ha ka rukom kaba dei.
Hashwa kane u Lat ka jylla ula leit hiar ha shnong Nartiang ban leit jngoh kyrpang ïa ki ar tylli ki jaka mane Blei (Mandir) ki Hindu ha Nartiang Durga Temple kaba la rim tam hapoh ka West Jaiñtia Hills District bad kumjuh ïa ka jaka ba pawnam haka kam jngohkai pyrthei kaba don ïa ki Mawbynna jong ki longshwa manshwa.
