Na ka ïing skul ba jot rathai sha ka shlem ai jinghikai ba paka ïoh ka Sohkhwai Govt. LP School

Nongpoh, Kyllalyngkot 03: Ka long shisha ka jingkyrkhu ka ba khraw ïaki nongshong shnong jong ka shnong Sohkhwai bad ïaki shnong kiba marjan ha ka ba hynnin ka sngi, na ka liang u MLA ka Nongpoh Constituency u Bah Mayralborn Syiem u la leit ban plie ïa ka ïing skul ka ba thymmai bad paka jong ka skul Sohkhwai Government LP School ka ba don ha ka shnong Sohkhwai bala tei haka jinglut kumba 37 lakh tyngka lyngba ka tnad Pule puthi jong ka sorkar jylla.
Kum ban shu kdew hangne Ia kane ka ïing skul la dep ban buh mawnongrim da u bah Mayralborn Syiem ban sdang tei Ia kane ka ïing skul ha ka 21 tarik Ïaiong jong u snem bala dep, hynrei haka sngi nyngkong jong ka taiew la lah ban plie paidbah noh ïa katei ka ïing skul, kaba don haduh 6 tylli ki kamra klas ka la long kaba ibit ban ai noh iïaka jingshakri sha ki kynnah skul jong katei ka thaiñ.
Ha kane ka sngi bala plie paidbah ïa katei ka ïing skul ba thymmai, la wan ban don ryngkat lang da u bah Balajied Rani MDC ka Nongpoh, ka kong P.L Nonglait DSEO Ri-Bhoi, u Bah Vincent Nianglang DMC, District Unit, u Bah Biren Rani CRC Niangbari, U bah Diang Namsaw, Vice President ka SMC, Bah Briestar Sylliang President SMC, ki ophisar naka tnad pule puthi, ki rangbah shnong, ki khynnah skul, ki nonghikai lem bad ki paidbah nongshnong shnong ka Sohkhwai.
Kum ban shu pynpaw ba katei ka skul barim ka don ruh hajan ka ïingmane ka Balang Presbyterian Sohkhwai ha kaba la donkam ban kynriah noh sha kawei ka jaka bad kumjuh ruh ka jinglong jingman katei ka skul barim naduh ki kamra Klass, ki tin bad ki jingker ruh ki la jot rathai bad kum ki nongïalam Shnong bad ki nonghikai ha ryngkat ki khynnah skul ki ladon ka jingangnud kaba khraw ba ka sorkar kan thaw lad thaw lynti noh na ka bynta ban ioh da ka ingskul ba thymmai, hynrei dei ka jingbuddien jong u MLA bad ki ophisar ka tnad pule puthi la lah ban pynieng da ka ïing skul ba thymmai ha katei ka shnong naka bynta ka jingmyntoi jong ki heprit ban pynphriang ïaka jingnang jingstad.
Naka liang ki bor pynïaid skul naduh ki nonghikai, ki la pynpaw ka jingsngew kmen kaba khraw ha kaba mynta ka sngi ki la ioh ban rung haka ïing skul kaba thymmai kaba skhem, bad ki la ïathuh ruh ba kum ki khynnah skul bad ki nonghikai ki mad jingeh shisha kaba khraw haki snem bala leit noh namar ka jingjot rathai jong ka skul ha kaba ki nonghikai bad ki khynnah skul ki hap ban pyndonkam da ki shatri haki kamra klas haka por slap, bad naka liang jong ki kila pynpaw ka jingsngew nguh ïaki nongmih khmat kumjuh ruh ïaki ophisar ka tnad pule puthi ba ki la lah ban pyn urlong ïa kane ka jingangnud jong ki ba bun ban ïoh noh ïaka ïing skul kaba skhem bad kaba paka.
Naka liang u Bah Mayral Born Syiem MLA ka Nongpoh haba kren ha katei ka sngi u la pynpaw ka jingsngewkmen kaba khraw bad ka long ka jingkyrkhu ïaka shnong Sohkhwai hadien ba ka sorkar lyngba ka tnad pule puthi kala mang ïa katei ka skhim ba kyrpang ha katei ka shnong ban tei da ka iing skul ba thymmai naka bynta ban dang pyntyllun ïaka jingshakri ban pynphriang ïaka jingnang jingstad ha katei ka thaiñ.
U la ong ruh ba ka shnong Sohkhwai ka dei kaba donbok ban ioh ïa katei ka skhim ba kyrmen ba katei ka skul kan long ka sharak sha ki heprit ha katei ka shnong ban ioh ïaka jingnang jingstad bad ka jinghikai ba kin san haka akor ka burom naka bynta ka lawei ba phyrnai jong ka dong bad ka thaiñ.