Shlei ki bar Jylla ha Shallang namar ki karkhana Coke beaiñ: Witting Mawsor

‘Ha Shallang lah ban shah beh kylla ha ki bar jylla’

0

Nongstoiñ, Nohprah 22: “Ka long kaei kaei kaba sngew thamula, hynrei ka long pat kaba shisha ba ïa ka ïew bad ka shnong Shallang kaba dang hap pura ha ka hima Nongstoiñ, la tap lup da u bar jylla. Ha kine ki sngi lei lei naduh ba ki karkhana thang dewïong ki la jyllei kum ki ñiut, ïa ka Shallang area baroh kawei la dap da ki bar jylla suda”, ong u bah Witting Mawsor President HSPDP West Khasi Hills.
U bah Witting Mawsor haba kren ha ka jingïalang kaba la pynlong ha ka madan phutbol jong ka shnong Seiñduli ha ka 21 tarik Nohprah, u la kren shai kdar halor kane da kaba ong ba ki bar jylla ha Shallang kim patiaw shuh ïa ki Khasi la ki dei ki trai shnong ne ki dei na kiwei pat ki shnong. U la ong ruh ba u la ju ïoh sngew barabor ba ki samla khamtam ki sengbhalang ki ju ong beh dkhar, hooid lada dei ha kiwei ki shnong hapoh ka district ka lah ban long. Hynrei ha Shallang pat lada ki ong beh dkhar khlem artatien kin shah beh kylla, namar ki bar jylla kim salia shuh bad ki ïaid pynat shadem khlem don jingtieng ïano ïano. Nalor kata u la ong ba ha Shallang lada phi pynwit ïa ki bar jylla phin ym ïoh leit phai ïing shuh.
U bah Mawsor u la ong ruh ba ka jingshngaiñ bad ka jingsngew skhem jong ki bar jylla ha Shallang ka dei namar ba u don u nongïada u ba long kum ka stieh na ka bynta jong ki. U la kren bynñiaw ruh ba u nongmihkhmat ba mynta jong ka Mawshynrut constituency, u kham ieit bun shah ïa ki bar jylla ban ïa ki trai jylla bad ka lah ban dei na kane ka daw ba kitei ki bar jylla kim salia shuh ïa ki trai jylla.
Haba kren pat ha kaba ïadei bad ka MLA skhim ba ka sorkar ka la mang kyrpang na ka bynta ki paitbah nongshong shnong, kum ka SRWP kaba dei ka skhim ba u MLA u dei ban ai sha kiba duk, u la ong ba ha ka por ba u long MLA, katei ka skhim ka dang poi tang shi klur tyngka.
Hynrei ha kane ka samoi kaba mynta pat ka la poi sha ka ar klur sanphew lak tyngka ha ka shi snem. Pynban katkum ka jingïoh jingtip jong u ka long ba ïa katei ka skhim, la ai tang ha kito kiba riewspah bad kiba don ba em, da kaba kynnoh ba lada ai ha kiba duk kin ym lah ban pyndep ha ka ban pyntrei ïa ki projek.
U la ong ruh ba kaba kham sngewsih ka long ba naduh u snem 2018, utei u MLA u la ai jingbit ïa ki katto katne ki nongshong shnong ba kin pynïeng ïa ki khyrdop harud surok ban lum pisa beaiñ na ki trok kit dewïong. U la ong ba man la ki shnong ki samla kiba lum pisa beaiñ ha ka kyrteng jong ki VDP, ka la jyllei la kum ki ñiut bad katei ka jingailad khlem artatien kan pynkylla nongtuh ïa ki samla lada ym don shuh ki trok kit dewïong.

Leave A Reply

Your email address will not be published.