Nongpoh, Nohprah 22: Ka kynhun Naki Thiar kaba dei kawei naki kynhun trei mon sngewbha kaba ju don bynta ban ïarap ïaki rangli juki bad kiba donkam ka jingïarap mynta ka sngi kala leit ban pynlong ka jinglehkmen Advance Christmas ryngkat ki khunswet jong ka Govt. Children’s Boys Home, Govt. Children’s Girls Home bad ki khunswet jong ka RBP Synod Children’s Home haka jinglehkmen ba shongkun bala pynlong ha RBP Synod Childrens Home ha Mawsyntai.
Ha katei ka jingïaleh-kmen ka ba long ruh kum shibynta ban rakhe lypa ïaka jingwan long briew u Khyllung Jisu sha kane ka pyrthei, la sakhi da ka jingdonlang u Samla Tony Shylla u nongseng jong katei ka kynhun, u Bah Pynwanbor Sylliang u Senior Adviser jong ka kynhun, u Bah Kitburom Mallai uba la wan ban mihkhmat naka CHILDLINE, ka kong Byntabiang M. Mawblei Superintendent jong ka Government Children girl’s Home, Bah Erry Ryngnga Superintendent jong ka Government Children boy’s home bad ka kong Darisha Mallai Superintendent jong ka RBP synod children’s home ryngkat ki heprit ki bym don shuh ki nongpeit nongkhmih bala ri bad sumar da kitei ki iing ri khunswet.
Ha kane ka jingleit rakhe ban ïalehkmen bad ki heprit jong ki lai tylli ki jaka ri khunswet, na ka liang ka kynhun Naki Thiar ki la ioh ruh ban sam ïaki jaiñ kup syaid sha baroh ki heprit, ha ka ba ki la ioh ruh ban bam sngewbha ïa u cake Christmas, ryngkat ka jinglehkmen da kaba shad bad rwai bala shim bynta lang da ki heprit jong kitei ki jaka ri khunswet.
