Nongpoh, Nohprah 22 : Ka long ka jingkyrkhu ïaka shnong Umngtyngar ha Ri-Bhoi kaba hap ha Jirang Constituency hadien ba u MLA ka Jirang u Bah Sosthenes Sohtun, ha ka sngi Baar jong ka taiew u la leit ban buh ïa u mawnongrim naka bynta ban siang rong noh ïa katei ka surok kaba ki paidbah kila ap khmih lynti la bun phew snem mynta.
Katei ka surok ka don ka jingjrong kumba 2.55 km na ka surokbah na Mairang sha Rani bala mang pisa haduh T.3,41,00,000 klur ha kaba ïaka jingtrei yn sa sdang noh ha u bnai Kyllalyngkot jong u snem 2023.
Ha katei ka sngi la don ryngkat ruh da u Bah I Khongkhlad, Additional Executive Engineer PWD (Rd) Patharkhmah, Rev Fr Michael Sun Parish Priest ka Umkadhor Parish, ki nongïalam shnong bad kiwei kiwei ki riew rangbah.
Haba kren ha kane ka sngi, na ka liang u MLA ka Jirang, u Bah Sosthenes Sohtun u la ai khublei ïa ki paidbah Nongshong shnong ka Umtyngar, ha kaba hapdeng shibun ki snem ba ki la ap khmih lynti ki la long kiba ïaishah bad ka jingïaishah jongki mynta ka la urlong kaba dei hadien ka jingphai khmat ka sorkar sha kane ka shnong bad wat ïa ka Jirang Constituency.
Kum u nongmihkhmat paidbah u la ong ruh ba u la pyrshang ban wad ki lad ki lynti na ka sorkar, hynrei dei lyngba ka jingphai khmat ka sorkar ïa kine ki jingdonkam ki paidbah ka sorkar ka la mang tyngka na ka bynta ban siang rong noh ïa kane ka surok ban suk ki paidbah ha ka leit ka wan bad ka kit ka bah bad kaba kham donkam tam ka longba ki paidbah pat ki dei ban ai ka jingsngewnguh ïa kane ka sorkar kaba la ïarap kyrpang ïa ka Jirang Constituency ha baroh ki liang, u la bynrap.
