Ka ophis ka dang buh tang ka jingthoh sha ka sorkar, ka rai ba khatduh ka dei ha ka sorkar, ong ka Kaiphod

Halor ka jingthmu ban pynkynriah ïa ka Umsning C&RD Block Office

0

Nongpoh, Nohprah 22: Kumba ha kine ki sngi hadien ba la mih ka khubor ba la thmu ban pynkynriah noh ïa ka ophis ka Umsning C&RD Block sha Lumumpih, la mih ka jingpyrshah da ka JAC ki 30 Durbar Shnong bad ki 3 tylli ki Seng Bhalang ba kynthup ïa ka HNYF, HITO bad CORP bad kumba la ioh lum jingtip na ka ophis u Block Developemnt Officer kane ka jingthmu ban pynkynriah ïa katei ka ophis ka dei tang ka jingphah ïa ka jingthoh sha ka sorkar bad ka rai kaba khatduh hi ka dei ha ka sorkar jylla hadien ba la ioh ei ïa ka jaka kaba 2 akar ba la ai sngewbha da ka trai jaka.
Katkum ka jingioh lum jingtip, ki don ar tylli ki jaka ba la ai sngewbha khlem da siew dor ba kynthup kawei ha Patarim Usmning bad kawei ha Lumumpih ba la ai sngewbha da ka trai jaka bad napeng kine ki ar tylli ki jaka ka jaka ha Lumumpih ka la long kaba biang ban tei thymmai ïa ka ka ophis Umsning C&RD Block bad katba ka jaka ha Patarim la kyntait noh na ka daw ka jingdon jong ki hyper tension line kaba lah ban buh jingma ïa ki paidbah.
Halor kane ka jingpyrshah ban pynkyn-riah ïa katei ka ophis da ka JAC bad ki seng bhalang, katkum ka kaiphod ba la ioh lum na ka ophs u BDO Umsning C&RD Block bad ba ka ophis ka la dep phah ïa kaipod (Reports) ne ki saw sha ka sorkar jylla, la ong ba ym dei tang ba la shu ioh ei ïa ka jaka bad la pynpaw ruh halor shibun ki daw bad khamtam katei ka jaka ha Lumumpih ka long kaba biang tam ban tei ïa ka ophis ba thymmai ka Umsning C&RD Block ba ka don harud ka surok National Highway.
La pynpaw ruh ba kane ka ophis ba la don lypa ka long kaba khapngiah bad kam don jaka wat tang ban pynieng ïa ki Kali ki nongtrei sorkar ne ki paidbah bad ka kynduh jingeh ruh halor ka jingkyrduh um bad ruh wat ki nongtrei sorkar ha katei ka ophis kim sngewtynnad halor shibun ki daw ba kum ka ophis kam ju ioh ka jingïatrei lang na ka Dorbar Shnong bad ki Seng Samla kiba juh buh jingeh ïa ka ophis bad wat ïa ki paidbah.
La pynpaw ruh ha katei ka kaiphod ba katei ka jaka dei ka GAD land ha kaba wat ban pynieng ïa u Mobile Tower la pyrshah da ka Seng Samla Shnong bad la kynnoh ruh ba ka ophis kam shim ïa ka NOC na ka Dorbar shnong, hynrei kim tip pat ba ha ka GAD land ka sorkar kam donkam ban pan NOC lada pyntreikam ïa kino kino ki kam pynroi. Nalor kata ka Seng Sasmla ka la ujor ruh sha u Deputy Commissioner ban weng ïa utei u Tower bad kane ka la buh jingeh shibun ha kaba bun ki kam hapoh ka ophis la shaniah ha ki bor internet ba kim shem jingeh na ka daw ka jingbym don ka network kaba biang.
La pynpaw ruh ha katei ka kaiphod ba la phah sha ka sorkar, ba ka ophis ka ïa kynduh shibun ki jingeh ha katei ka jaka treikam bad ki jingjia ba sngewsih ha kaba la don ka jingshah kawang maw ïa ka ophis, ka jingshah pynpra u pipe um ba pynpoi um sha ka ophis, la don ruh ka khep ba shah kawang petrol bom bad kiwei kiwei ki jingjia ba la dep ban ujor ruh da ka ejehar sha ki bor pulit, hynrei haduh mynta ym shem la ïoh kem ïa kiba don kti bad kum ka ophis ruh ka kynduh jingeh ka dei nanmar ba kam ju ïoh ka jingïatrei lang da ka bor shnong.
La don ruh ka jingpynsah jubor ïa ki Nepali ha ka quarter jong ka ophis bad hadien ba la weng ïa ki la ïoh jingtip ba la ai bor da u rangbah shnong barim bad wat ha ka por ka jinglynshop ka khlam Covid-19 ruh ki paidbah ki ïa kynduh shibun ki jingeh ha kaba wat la katei ka jaka dei ka jaka sorkar bad la wan pat ban mushli da ki bor shnong bad ki samla Shnong.
Shuh shuh, la pynpaw ruh ba katkum ka khubor ba la ioh lum na ophis u BDO ki don shibun ki jingeh ha katei ka ophis bad wat ki nongtrei sorkar ruh kim sngewtynnad ha katei ka jaka bad ka rai kaba khatduh pat ban pynkynriah ïa ka ophis ka dei ha ka sorkar bad la pynpaw ruh lada pynkynriah ïa katei ka ophis ruh ka jingmyntoi ka dei ïa ki paidbah bad wat ïa ka sorkar, namar ïa katei ka ophis barim lah ban pyndonkam kum kata kka extension block ban pyndonkam na ka bynta ka ophis ka CDPO, SSA Block Coordinator, NRLM, CLLAMP, Basin bad kiwei ki ophis khnang ban kham suk ki paidbah, la pynpaw ruh ha katei ka kaiphod ba la phah sha ka sorkar jylla.

Leave A Reply

Your email address will not be published.